പീഡന വിവരം പൊലീസില്‍ അറിയിച്ച പെണ്‍കുട്ടിയെ തീകൊളുത്തി കൊല്ലാൻ ശ്രമം; യുവാക്കള്‍ ഒളിവില്‍

പീഡന വിവരം പൊലീസില്‍ അറിയിച്ച പെണ്‍കുട്ടിയെ തീകൊളുത്തി കൊല്ലാൻ ശ്രമം. ഉത്തർപ്രദേശിലെ മണിപ്പൂരിയിലാണ് സംഭവം. പൊള്ളലേറ്റ പെണ്‍കുട്ടിയെ ആശുപത്രിയില്‍ പ്രവേശിപ്പിച്ചു. ഇവരുടെ നില ഗുരുതരമല്ലെന്ന് ആശുപത്രി അധികൃതര്‍ വ്യക്തമാക്കി.

പെണ്‍കുട്ടിയെ കൊലപ്പെടുത്താന്‍ ശ്രമിച്ച മൂന്ന് യുവാക്കളും ഒളിവിലാണ്. ഇവര്‍ക്കായി തിരച്ചില്‍ ശക്തമാക്കിയെന്ന് പൊലീസ് വ്യക്തമാക്കി. കേസ് അന്വേഷണത്തിന്റെ ആദ്യ ഘട്ടത്തില്‍ വീഴ്‌ച വരുത്തിയ ഒരു പൊലീസ് ഉദ്യോഗസ്ഥനെ സസ്‌പെന്‍‌ഡ് ചെയ്‌തു.

രണ്ട് മാസമായി പെണ്‍കുട്ടിയെ യുവാക്കള്‍ ലൈംഗികമായി പീഡിപ്പിക്കുകയായിരുന്നു. വിവരം പുറത്തു പറഞ്ഞാല്‍ കൊല്ലുമെന്ന ഭീഷണിയുണ്ടായിരുന്നതിനാല്‍ യുവതി ഇക്കാര്യം മറച്ചുവച്ചു. പീഡനം സഹിക്കാനാകാതെ വന്നതോടെ ഇവര്‍ പൊലീസില്‍ പരാതിപ്പെടുകയായിരുന്നു.

യുവതി പൊലീസില്‍ പരാതിപ്പെട്ടതോടെ യുവാക്കള്‍ പെൺകുട്ടിയുടെ വീട്ടിൽ അതിക്രമിച്ചു കടന്ന് തീ കൊളുത്തുകയായിരുന്നു. സംഭവത്തിനു ശേഷം മൂന്ന് യുവാക്കളും രക്ഷപ്പെടുകയായിരുന്നു. തുടര്‍ന്ന് സമീപവാസികളാണ് പെണ്‍കുട്ടിയെ ആശുപത്രിയില്‍ എത്തിച്ചത്.