‘ഞാന്‍ കൊന്നതല്ല, തീകൊളുത്തി അവള്‍ ആത്മഹത്യ ചെയ്യുകയായിരുന്നു’ - പ്രിയതമയെ കൊലപ്പെടുത്തിയ ഭര്‍ത്താവിന്റെ വാക്കുകള്‍ ഇങ്ങനെ

മെഡിക്കല്‍ പ്രവേശന പരീക്ഷയില്‍ തോറ്റു; ഭാര്യയെ ഭര്‍ത്താവ് തീകൊളുത്തി കൊന്നു

പരീക്ഷയില്‍ തോറ്റതിനു ഭാര്യയെ ഭര്‍ത്താവ് കൊലപ്പെടുത്തി. കഴിഞ്ഞ ദിവസം ഹൈദരാബാദിലാണ് ദാരുണമായ സംഭവം നടന്നത്. നാഗോള്‍ സ്വദേശിനിയായ ഹരികയെന്ന 25കാരിയാണ് അതിദാരുണമായി മരണപ്പെട്ടത്. മെഡിക്കല്‍ പ്രവേശന പരീക്ഷയില്‍ തോറ്റതിന് ഹരികയെ ഭര്‍ത്താവ് റിഷി കുമാര്‍ തീകൊളുത്തി കൊലപ്പെടുത്തുകയായിരുന്നു. 

രണ്ട് വര്‍ഷം മുമ്പാണ് റിഷി കുമാറിന്റെയും ഹരികയുടെയും വിവാഹം കഴിഞ്ഞത്. ഹരിക എംബിബിഎസ് പ്രവേശന പരീക്ഷ എഴുതിയെങ്കിലും സീറ്റ് ലഭിച്ചില്ല. ഇതിനെ ചൊല്ലി രണ്ട് പേരും തമ്മില്‍ കലഹം പതിവായിരുന്നു. ഇക്കാര്യം ഹരികയുടെ സഹോദരി പൊലീസിനോട് വ്യക്തമാക്കിയിട്ടുണ്ട്. 

അതോടൊപ്പം, സ്ത്രീധനത്തുക ആവശ്യപ്പെട്ടുകൊണ്ട് റിഷി കുമാര്‍ ഹരികയെ നിരന്തരം ഉപദ്രവിക്കാറുണ്ടായിരുന്നെന്ന് ഹരികയുടെ അമ്മയും പൊലീസിനു മൊഴി നല്‍കി. റിഷി കുമാറാണ് ഹരിക ദേഹമാസകലം മണ്ണെണ്ണ ഒഴിച്ച് തീ കൊളുത്തി ആത്മഹത്യ ചെയ്‌തെന്ന് തന്നെ വിളിച്ചറിയിച്ചതെന്നും ഇവര്‍ പൊലീസിനോട് പറഞ്ഞു. 

എന്നാല്‍ ഹരികയെ കൊലപ്പെടുത്തിയതല്ലെന്നും സീറ്റ് ലഭിക്കാത്തതില്‍ മനംനൊന്ത് അവള്‍ ആത്മഹത്യ ചെയ്യുകയായിരുന്നുവെന്നും ഋഷി കുമാര്‍ പറഞ്ഞു. അവളെ ഞാന്‍ കൊലപ്പടുത്തിയില്ലെന്നും ഇയാള്‍ പറയുന്നു. പെണ്‍കുട്ടിയുടെ ബന്ധുക്കളുടെ പരാതിയില്‍ ഋഷി കുമാറിനെയും മാതാപിതാക്കളെയും പോലീസ് അറസ്റ്റ് ചെയ്തു.