ക്ഷേത്രത്തിലിരുന്ന് ശിവലിംഗങ്ങള്‍ നിര്‍മിച്ചുകൊണ്ടിരുന്ന കുട്ടികളുടെ പുറത്ത് മതില്‍ ഇടിഞ്ഞുവീണു; 9കുട്ടികള്‍ക്ക് ദാരുണാന്ത്യം

മധ്യപ്രദേശില്‍ വീടിന്റെ മതില്‍ ഇടിഞ്ഞുവീണ് 9 കുട്ടികള്‍ മരിച്ചു. സാഗര്‍ ജില്ലയിലെ ഷാഹ്പുര്‍ ഹര്‍ദൗള്‍ ബാബ ക്ഷേത്രത്തിന് സമീപമാണ് അപകടം ഉണ്ടായത്. ഇന്നലെ രാവിലെയായിരുന്നു സംഭവം. 10 -15 പ്രായമുള്ള കുട്ടികളാണ് അപകടത്തില്‍പ്പെട്ടത്. നിരവധി പേര്‍ക്ക് പരിക്കേറ്റു. ക്ഷേത്രത്തിലിരുന്ന് ശിവലിംഗങ്ങള്‍ നിര്‍മിച്ചുകൊണ്ടിരുന്ന കുട്ടികളുടെ നേര്‍ക്ക് തൊട്ടടുത്ത വീടിന്റെ മതില്‍ ഇടിഞ്ഞ് വീഴുകയായിരുന്നുവെന്ന് പ്രാദേശിക ഭരണകൂടം അറിയിച്ചു. 

മതിലിന് ഏകദേശം 50 വര്‍ഷം പഴക്കമുണ്ടെന്നാണ് വിവരം. കനത്ത മഴയില്‍ നനഞ്ഞ് കുതിര്‍ന്ന മതിലാണ് ഇടിഞ്ഞു വീണത്. മധ്യപ്രദേശ് മുഖ്യമന്ത്രി മോഹന്‍ യാദവ് സംഭവത്തില്‍ അനുശോചനം രേഖപ്പെടുത്തി. നാലുലക്ഷം വീതം കുടുംബങ്ങള്‍ക്ക് ധനസഹായം നല്‍കും.