എന്റെ വയറിന് അത്ര സുഖമില്ലായിരുന്നു; അടിവസ്ത്രം മാത്രം ധരിച്ച് ട്രെയിനില്‍ യാത്ര ചെയ്തതിനെ കുറിച്ച് എംഎല്‍എ

അടിവസ്ത്രം മാത്രം ധരിച്ച് ട്രെയിനില്‍ യാത്ര ചെയ്ത സംഭവത്തില്‍ വിശദീകരണവുമായി ബിഹാറിലെ ജെഡിയു എംഎല്‍എ ഗോപാല്‍ മണ്ഡല്‍. തന്റെ വയറിനു അത്ര സുഖമില്ലായിരുന്നു എന്നും അതുകൊണ്ടാണ് അടിവസ്ത്രം മാത്രം ധരിച്ച് ട്രെയിനില്‍ യാത്ര ചെയ്തതെന്നും ഗോപാല്‍ മണ്ഡല്‍ പറഞ്ഞു. മറ്റ് വഴികളൊന്നും ഇല്ലാത്തതിനാല്‍ ആണ് താന്‍ അടിവസ്ത്രം മാത്രം ധരിച്ചതെന്നും എംഎല്‍എ വിശദീകരിച്ചു. 

പട്‌നയില്‍ നിന്ന് ഡല്‍ഹിയിലേക്കുള്ള തേജസ് രാജധാനി എക്‌സ്പ്രസിലാണ് യാത്രാമധ്യേ എംഎല്‍എ ഗോപാല്‍ മണ്ഡലിനെ അടിവസ്ത്രം മാത്രം ധരിച്ച് കാണപ്പെട്ടത്. ഇതിന്റെ ദൃശ്യങ്ങള്‍ നേരത്തെ പുറത്തുവന്നിരുന്നു. എംഎല്‍എയുടെ വേഷവിധാനത്തെ ചോദ്യം ചെയ്ത സഹയാത്രക്കാരെ അസഭ്യം പറയുകയും വെടിവെക്കുമെന്ന് ഭീഷണിപ്പെടുത്തുകയും ചെയ്തതും വിവാദത്തിലായി. 

സ്ത്രീകള്‍ ഉള്‍പ്പെടെ യാത്ര ചെയ്തിരുന്ന കമ്പാര്‍ട്ട്‌മെന്റിലാണ് ഗോപാല്‍ മണ്ഡല്‍ അടിവസ്ത്രം ധരിച്ച് യാത്ര ചെയ്തത്. വ്യാഴാഴ്ച രാത്രി പട്‌നയില്‍ നിന്ന് ഡല്‍ഹിയിലേക്കായിരുന്നു യാത്ര. സഹയാത്രികനായിരുന്ന പ്രഹ്ളാദ് എന്നയാളാണ് എംഎല്‍എയെ ചോദ്യം ചെയ്തത്. എംഎല്‍എയാണ് എന്നറിയാതെയാണ് താന്‍ ചോദ്യം ചെയ്തതെന്നും എന്നാല്‍ ക്ഷുഭിതനായ ഗോപാല്‍ മണ്ഡല്‍ തന്റെ സഹോദരിയേയും അമ്മയേയും ചേര്‍ത്ത് അസഭ്യം പറഞ്ഞെന്നും പ്രഹ്‌ളാദ് ആരോപിച്ചു.