നിയന്ത്രണം നഷ്ടമായ ഹെലികോപ്റ്ററിൽനിന്ന് ചാടി രക്ഷപ്പെടാന്‍ ശ്രമിച്ചയാള്‍ മരിച്ചു; അകത്തിരുന്നവർ രക്ഷപ്പെട്ടു !

അപകടത്തിൽപ്പെട്ട ഹെലികോപ്റ്ററിൽനിന്ന് ചാടിയയാൾ മരിച്ചു

നിയന്ത്രണം നഷ്ടമായതിനെതുടര്‍ന്ന് അപകടത്തിലേക്കു നീങ്ങിയ ഹെലികോ‍പ്റ്ററിൽനിന്നു നിന്നും പുറത്തേക്ക് ചാടി രക്ഷപ്പെടാൻ ശ്രമിക്കുന്നതിനിടെ ഹെലികോപ്റ്ററിന്റെ പങ്ക തട്ടി എൻജിനീയർ മരിച്ചു. പൈലറ്റും സഹപൈലറ്റും ഉൾപ്പെടെ ഹെലികോപ്റ്ററിലുണ്ടായിരുന്ന ഏഴു പേരും രക്ഷപ്പെട്ടു. ഹെലികോപ്റ്റർ എൻജിനീയറായ അസം സ്വദേശി വിക്രം ലാംബയാണ് മരിച്ചത്.

ഉത്തരാഖണ്ഡിലെ ബദ്‍രിനാഥിൽ ഇന്നു രാവിലെ 7.45നാണ് അപകടമുണ്ടായത്. ഹരിദ്വാറിലേക്ക് പോവുകയായിരുന്ന ഹെലികോപ്റ്ററിന് പറന്നുയർന്ന ഉടൻ തന്നെ നിയന്ത്രണം നഷ്ടമാകുകയായിരുന്നു. കോപ്റ്റർ അപകടത്തിൽപ്പെട്ടുവെന്ന് കരുതിയ എൻജിനിയർ ചെറിയ ഉയരത്തിൽ നിന്നും താഴേക്ക് ചാടുകയായിരുന്നു. എന്നാൽ, ചാട്ടത്തിനിടെ ഹെലികോപ്റ്ററിന്റെ പങ്കയ്ക്കുള്ളിൽപ്പെട്ടാണ് മരണം സംഭവിച്ചത്.

ഗുജറാത്തിലെ വഡോദരയിൽ നിന്നുള്ള തീർഥാടകരുമായി ഹരിദ്വാറിലേക്ക് പോവുകയായിരുന്ന ഹെലികോപ്റ്ററാണ് അപകടത്തില്‍പ്പെട്ടത്. തീർഥാടകർ പിന്നീട് റോഡുമാർഗം യാത്ര തുടർന്നു. അപകടത്തിൽ ഉത്തരാഖണ്ഡ് മുഖ്യമന്ത്രി ത്രിവേന്ദ്ര റാവത്ത് ദുഃഖം രേഖപ്പെടുത്തി. ജീവൻ നഷ്ടമായ വിക്രം ലാംബയുടെ കുടുംബത്തിന്റെ ദുഃഖത്തിൽ പങ്കുചേരുന്നുവെന്ന് അദ്ദേഹം പറഞ്ഞു.