പട്ടാപ്പകല്‍ അയാള്‍ ചന്തയിലൂടെ പെണ്‍കുട്ടിയെ ഓടിച്ചിട്ട് അവളുടെ ഒരു കൈ വെട്ടിമാറ്റി! - കാരണമറിഞ്ഞ് പൊലീസും നാട്ടുകാരും ഞെട്ടി

എന്താണ് സംഭവിക്കുന്നതെന്ന് മനസ്സിലാകുന്നതിന് മുന്നേ അവളുടെ ഒരു കൈ അയാള്‍ വെട്ടിമാറ്റിയിരുന്നു!

സ്ത്രീകള്‍ക്ക് ഒരു സുരുക്ഷിതത്വവുമില്ലാത്ത നാടാ‍യി മാറിയിരിക്കുകയാണ് ഉത്തര്‍പ്രദേശ്. അടുത്തിടെ റിപ്പോര്‍ട്ട് ചെയ്യുന്ന വാര്‍ത്തകള്‍ ഇതിനുദാഹരണമാണ്. സമാനമായ ഒരു സംഭവമാണ് ഷാജന്‍പൂരിലെ ലഖിം‌പൂര്‍ ഖേരിയിലെ തിരക്കേറിയ ചന്തയില്‍ നടന്നത്. പ്രണയാഭ്യര്‍ത്ഥന നിരസിച്ചതിന് യുവാവ് പെണ്‍കുട്ടിയുടെ ഒരു കൈ മുറിച്ച് മാറ്റി. ബുധനാഴ്ചയായിരുന്നു നാടിനെ നടുക്കിയ സംഭവം. 

വിനോദ് ചൌരസ്യ എന്ന യുവാവാണ് ഒമ്പതാം ക്ലാസില്‍ പഠിക്കുന്ന പെണ്‍കുട്ടിയുടെ ഒരു കൈ വെട്ടിമാറ്റിയത്. പ്രണയാഭ്യര്‍ത്ഥന നിരസിച്ചതാണ് കാരണമെന്ന് പൊലീസ് പറയുന്നു. കഴിഞ്ഞ ദിവസം പെണ്‍കുട്ടി ചന്തയില്‍ വന്നപ്പോഴും യുവാവ് പ്രണയാഭ്യര്‍ത്ഥന നടത്തി. എന്നാല്‍, പെണ്‍കുട്ടി ഇത് നിരസിച്ചതോടെ യുവാവ് ദേഷ്യപ്പെടുകയായിരുന്നു. 

അടുത്തുള്ള കടയില്‍ നിന്നും വെട്ടുകത്തിയെടുത്ത് പെണ്‍കുട്ടിയെ ഉപദ്രവിക്കാന്‍ ശ്രമിക്കുകയായിരുന്നു. ചന്തയിലൂടെ ഓടിയ പെണ്‍കുട്ടിയെ ഇയാള്‍ ഓടിച്ചിട്ട് തള്ളി വീഴ്ത്തിയശേഷം കൈ വെട്ടുകയായിരുന്നു. 300ലധികം ആളുകള്‍ ചന്തയില്‍ ഉണ്ടായിരുന്നു. എന്താണ് സംഭവമെന്ന് ആര്‍ക്കും മനസ്സിലായില്ല. മനസ്സിലായി വന്നപ്പോഴേക്കും ഒരു കൈ മുറിഞ്ഞിരുന്നു.

രണ്ടാമത്തെ കൈയും വെട്ടിമാറ്റാര്‍ ശ്രമിച്ച യുവാവിനെ നാട്ടുകാര്‍ വളഞ്ഞു തല്ലിച്ചതച്ചു. യുവാവിനെ പൊലീസില്‍ ഏല്‍പ്പിച്ചു. രക്തം വാര്‍ന്നതോടെ വിദഗ്ധ ചികിത്സക്കായി പെണ്‍കുട്ടിയെ മികച്ച ആശുപത്രിയില്‍ പ്രവേശിപ്പിച്ചിരിക്കുകയാണ്.