ശ്രീലങ്കയ്ക്ക് ഉജ്ജ്വല വിജയം

PTI

ബംഗ്ലാദേശില്‍ നടക്കുന്ന ത്രിരാഷ്‌ട്ര ഏകദിന ടൂര്‍ണമെന്റില്‍ ശ്രീലങ്കയ്ക്ക് ഉജ്ജ്വല വിജയം. 50 ഓവറില്‍ ശ്രീലങ്ക നേടിയ 210 എന്ന സ്കോറിനെ പിന്തുടര്‍ന്ന സിം‌ബാബ്‌വേ 80 റണ്‍സെടുക്കുമ്പോഴേക്കും എല്ലാവരും പുറത്താകുകയായിരുന്നു. ശ്രീലങ്കയ്ക്ക് വേണ്ടി അര്‍ദ്ധ സെഞ്ച്വറി നേടുകയും ഒരു വിക്കറ്റെടുക്കുകയും ചെയ്ത മാത്യൂസ് ആണ് കളിയിലെ കേമന്‍.

ടോസ് നഷ്‌ടപ്പെട്ട ബാറ്റിംഗിനിറങ്ങിയ ശ്രീലങ്കയ്ക്ക് നല്ല തുടക്കം ലഭിച്ചെങ്കിലും പിന്നീട് വന്ന മുഖ്യബാറ്റ്സ്മാ‍ന്‍‌മാര്‍ വന്നപോലെ തിരിച്ച് പോകുന്ന അവസ്ഥയാണുണ്ടായത്. ആറാമനായി ഇറങ്ങിയ മുബാറക്കും (31) ഏഴാമനായിറങ്ങിയ മാത്യൂസും (52) ചേര്‍ന്നാണ് ശ്രീലങ്കയ്ക്ക് മാന്യമായ സ്കോര്‍ നേടി കൊടുത്തത്.

സിം‌ബാബ്‌വേ ബാറ്റിംഗിനിറങ്ങിയപ്പോള്‍ തന്നെ പിഴച്ചു സ്കോറ് ബോര്‍ഡില്‍ അഞ്ചില്‍ എത്തിയപ്പോള്‍ തകര്‍ന്ന് തുടങ്ങിയ സിം‌ബാബ്‌വേയെ പിടിച്ചു നിര്‍ത്താന്‍ ആര്‍ക്കും കഴിഞ്ഞില്ല. മൂന്ന് വിക്കറ്റ് വീതം നേടിയ കുലശേഖരയും മെന്‍ഡിസും സിം‌ബാബ്‌വേയെ 80 റണ്‍സിനുള്ളില്‍ ചുരുട്ടി കെട്ടുകയായിരുന്നു. സിം‌ബാബ്‌വേക്ക് വേണ്ടി മാറ്റ്സികെന്‍‌ഹേരി മാത്രമാണ് രണ്ടക്കം തികച്ചത്. മെന്‍ഡീസ് ഈ മൂന്ന് വിക്കറ്റ് നേട്ടത്തോടെ ഏകദിനത്തില്‍ വേഗത്തില്‍ 50 വിക്കറ്റ് തികയ്ക്കുന്ന താരമായി തീര്‍ന്നു.