കേരളാ ബ്ലാസ്റ്റേഴ്സ് മാത്രമല്ല, ഐ എസ് എല്ലില്‍ തിരുവനന്തപുരത്തിനും ടീം വരുന്നു?

ഇന്ത്യന്‍ സൂപ്പര്‍ ലീഗ് ഫുട്ബോളില്‍ കേരള ബ്ലാസ്റ്റേഴ്സിന് പുറമേ തിരുവനന്തപുരത്തിനും ടീം വരാന്‍ സാധ്യത. ടീമുകള്‍ ആരംഭിക്കാന്‍ താല്‍പര്യമുള്ളവരെ ലേലത്തിന് ക്ഷണിച്ച് ഫുട്ബോള്‍ സ്പോര്‍ട്സ് ഡെവലപ്മെന്റ് ലിമിറ്റഡ് അറിയിപ്പു പ്രസിദ്ധീകരിച്ചു. രാജ്യത്തെ പത്തു നഗരങ്ങള്‍ കേന്ദ്രീകരിച്ചാണ് പുതിയ ടീമുകള്‍ വരുന്നത്. ഈ പട്ടികയില്‍ തിരുവനന്തപുരവും ഇടം‌പിടിച്ചിട്ടുണ്ട്. 

2018 ഒക്ടോബര്‍ മുതല്‍ ഡിസംബര്‍ വരെയാണ് അടുത്ത സീസണ്‍ ഐഎസ്എല്‍ അരങ്ങേറുന്നത്. ഇതില്‍ മൂന്ന് ടീമുകള്‍ കൂടി പുതിയതായി ഉള്‍പ്പെടുത്താനാണ് ഐ എസ് എല്‍ നടത്തിപ്പുകാര്‍ തീരുമാനിച്ചിരിക്കുന്നത്.

തിരുവനന്തപുരത്തിന് പുറമെ ഹൈദരാബാദ്, ജംഷഡ്പുര്‍, അഹമ്മദാബാദ്, കട്ടക്ക്, ബെംഗളൂരു, ദുര്‍ഗാപുര്‍, കൊല്‍ക്കത്ത, റാഞ്ചി തുടങ്ങിയ നഗരങ്ങളെയാണ് ലേലത്തിനുള്ള പട്ടികയില്‍ ഉള്‍പ്പെടുത്തിയിരിക്കുന്നത്. നിലവില്‍ ഐഎസ്എല്ലില്‍ എട്ടു ടീമുകളുണ്ട്.