ലാസര്‍ എളേപ്പന്‍ ട്രെന്‍‌ഡിംഗില്‍ നമ്പര്‍ വണ്‍, പേര് ‘നേശാമണി’ എന്നാണെന്ന് മാത്രം!

ഫ്രണ്ട്സ് എന്ന സിദ്ദിക്ക് ചിത്രം ആരും മറന്നിരിക്കാനിടയില്ല. ജയറാമും മുകേഷും ശ്രീനിവാസനും ജഗതിയും ചിരിയുടെ പൂരമൊരുക്കിയ സിനിമ. ആ സിനിമയില്‍ ജഗതി അവതരിപ്പിച്ച പെയിന്‍റിംഗ് കോണ്‍‌ട്രാക്‍ടര്‍ ലാസര്‍ എളേപ്പനെയും (ചക്കച്ചാമ്പറമ്പില്‍ ലാസര്‍) ഏവരും ഓര്‍ക്കുന്നുണ്ടാവും. ലാസര്‍ എളേപ്പന്‍റെ തലയില്‍ ചുറ്റിക വീണ രംഗവും ഇപ്പോള്‍ എല്ലാവരുടെയും മനസില്‍ വരുമെന്ന് നിശ്ചയം.

സിദ്ദിക്ക് ‘ഫ്രണ്ട്സ്’ അതേ പേരില്‍ തമിഴിലേക്ക് റീമേക്ക് ചെയ്തിരുന്നു. വിജയ്, സൂര്യ, രമേഷ് കണ്ണ, വടിവേലു തുടങ്ങിയവര്‍ തകര്‍ത്തഭിനയിച്ച ചിത്രം വന്‍ ഹിറ്റായി മാറി. ജഗതി അവതരിപ്പിച്ച ലാസര്‍ എളേപ്പനായി തമിഴില്‍ അഭിനയിച്ചത് വടിവേലു ആയിരുന്നു. കോണ്‍‌ട്രാക്‍ടര്‍ നേശാമണി എന്നായിരുന്നു കഥാപാത്രത്തിന്‍റെ പേര്.

ഈ നേശാമണിയാണ് ഇപ്പോള്‍ ട്വിറ്ററിലും ഫേസ്ബുക്കിലും ട്രെന്‍ഡിംഗ് ആയി മാറിയിരിക്കുന്നത്. #PrayForNesamani എന്ന പേരില്‍ ട്രോള്‍ പടരുകയാണ്. ആ കഥാപാത്രത്തെ വച്ച് ട്രോളര്‍മാര്‍ അവരുടെ ക്രിയേറ്റുവിറ്റിയുടെ പരകോടിയിലാണ് ഇപ്പോള്‍ സൃഷ്ടികള്‍ നടത്തിക്കൊണ്ടിരിക്കുന്നത്.

2001ല്‍ റിലീസായ ചിത്രത്തിലെ ഒരു കഥാപാത്രം ഇപ്പോള്‍ എങ്ങനെ ട്രെന്‍ഡിംഗ് ആയി മാറി എന്നാണോ ആലോചിക്കുന്നത്? സിവില്‍ എഞ്ചിനീയറിംഗ് ലേണേഴ്സ് എന്ന ഗ്രൂപ്പില്‍ ഒരു ചുറ്റികയുടെ പടം കൊടുത്തിട്ട് ഇതിന് നിങ്ങളുടെ രാജ്യത്ത് എന്താണ് പേരെന്ന് ഒരാള്‍ ചോദിച്ചതാണ് ട്രോളുകളുടെ തുടക്കം. ആ ചോദ്യത്തിന് ഒരാള്‍ “ഇതിന് ചുറ്റിക എന്നാണ് പറയുന്നത്. ഇത് വച്ച് എന്തിലെങ്കിലും അടിക്കുമ്പോള്‍ ടങ് ടങ് എന്ന് ശബ്ദം ഉണ്ടാകും. കൊട്ടാരത്തില്‍ വച്ച് ഈ ചുറ്റിക വീണാണ് പെയിന്‍റിംഗ് കോണ്‍‌ട്രാക്ടര്‍ നേശാമണിയുടെ തല തകര്‍ന്നത്” - എന്ന് മറുപടി നല്‍കി.

നേശാമണി ഒരു സിനിമാ കഥാപാത്രമാണെന്ന് മനസിലാകാതെ മറ്റൊരാള്‍ ‘അയാള്‍ക്ക് ഇപ്പോള്‍ എങ്ങനെയുണ്ട്? ഓകെ ആയോ?” എന്ന് ചോദിച്ചു. പിന്നീട് നേശാമണിയുടെ ആരോഗ്യത്തിന് വേണ്ടി പ്രാര്‍ത്ഥിക്കാമെന്ന് അയാള്‍ തന്നെ കുറിച്ചു. പിന്നാലെ #Pray_for_Nesamani എന്ന ഹാഷ്‌ടാഗും സൃഷ്ടിക്കപ്പെട്ടു.

ഇത് വൈറലായി മാറുകയായിരുന്നു. നരേന്ദ്രമോദി വീണ്ടും അധികാരമേല്‍ക്കുന്നു എന്ന വാര്‍ത്തയേക്കാള്‍ ട്രെന്‍ഡിംഗ് ആയി നേശാമണി നില്‍ക്കുന്നു എന്നതാണ് വസ്തുത.