മോഹന്‍ലാലിന്‍റെ തെലുങ്ക് പ്രവേശം ആഘോഷമാക്കി രാജമൌലി !
“മോഹന്‍ലാലിനെ തെലുങ്കിലേക്ക് കൊണ്ടുവന്നതിന് നന്ദി” - രാജമൌലി ആവേശത്തില്‍ !
“ഞാന്‍ ഏറ്റവുമധികം ബഹുമാനിക്കുന്ന മോഹന്‍ലാലിനെ തെലുങ്കിലേക്ക് കൊണ്ടുവന്നതിന് നന്ദി” - പറയുന്നത് മറ്റാരുമല്ല, ഇന്ത്യന്‍ സിനിമയിലെ ഷോമാന്‍ എസ് എസ് രാജമൌലി. ബാഹുബലി 2ന്‍റെ യുദ്ധചിത്രീകരണം പ്രതിബന്ധങ്ങളൊന്നുമില്ലാതെ പുരോഗമിക്കുന്നതിനിടയിലാണ് രാജമൌലി തനിക്കേറ്റവും പ്രിയപ്പെട്ട നടനെ തെലുങ്ക് പ്രേക്ഷകര്‍ക്കായി ലഭിച്ചതില്‍ സന്തോഷം അറിയിച്ചിരിക്കുന്നത്.
‘മനമന്ത’ എന്ന തെലുങ്ക് ചിത്രത്തിലൂടെയാണ് മോഹന്‍ലാല്‍ തെലുങ്കിലേക്ക് പ്രവേശിക്കുന്നത്. ചിത്രത്തിന്‍റെ ടീസര്‍ പുറത്തിറങ്ങി. മോഹന്‍ലാലിന് ഗൌതമിയാണ് നായികയായിരിക്കുന്നത്. ചിത്രത്തിന്‍റെ ടീസറും രാജമൌലി പങ്കുവച്ചിട്ടുണ്ട്.
ചന്ദ്രശേഖര്‍ യെലേതിയാണ് മനമന്ത സംവിധാനം ചെയ്തിരിക്കുന്നത്. തമിഴിലും മലയാ‍ളത്തിലുമായി സിനിമ പുറത്തിറങ്ങും. മലയാളത്തില്‍ ‘വിസ്മയം’ എന്നാണ് സിനിമയ്ക്ക് പേര്.
ജൂലൈയിലാണ് സിനിമ പ്രദര്‍ശനത്തിനെത്തുന്നത്. അതിനുശേഷം മോഹന്‍ലാലിന്‍റെ ‘ജനതാ ഗാരേജ്’ എന്ന തെലുങ്ക് സിനിമയും റിലീസാകും. 2018ല്‍ മോഹന്‍ലാലും രാജമൌലിയും ഒന്നിക്കുമെന്നും റിപ്പോര്‍ട്ടുകളുണ്ട്.
