സിനിമയിലെ താപ്പനകള്‍ ‘ചിലരെ’ ഒറ്റപ്പെടുത്തുന്നുണ്ട്, അതിനി ഒളിച്ചുവെക്കേണ്ട കാര്യമില്ല; റിമ കല്ലിങ്കല്‍ തുറന്നടിക്കുന്നു
സിനിമയിലെ ആണുങ്ങളോട് കളിച്ചതിന്റെ പേരില്‍ പലര്‍ക്കും അവസരങ്ങള്‍ നഷ്ടമാകുന്നുണ്ടെന്ന് റിമ കല്ലിങ്കല്‍
സമകാലിന വിഷയങ്ങളോട് പ്രതികരിക്കുന്ന പല നടിമാര്‍ക്കും സിനിമാ മേഖലയില്‍ നിന്ന് വിലക്ക് നേരിടേണ്ടി വരുന്നുണ്ടെന്ന വെളിപ്പെടുത്തലുമായി ചലച്ചിത്ര താരം റിമ കല്ലിങ്കല്‍. നടിയെ ആക്രമിച്ച സംഭവത്തില്‍ പ്രതികരിച്ചതിനു ശേഷം ചിലര്‍ക്കെല്ലാം റോളുകള്‍ നഷ്ടപ്പെടുത്തുന്നുണ്ട്, ചിലരെ മനപൂര്‍വ്വം ഒറ്റപ്പെടുത്തുന്നുമുണ്ട്. അത് ഇനി ഒളിച്ചുവെക്കണ്ട കാര്യമൊന്നുമില്ല.
സ്ത്രീകളെ ഒറ്റപ്പെടുത്താന്‍ വളരെ എളുപ്പമാണ്. ഞങ്ങള്‍ കുറച്ചുപേരല്ലേ ഉള്ളൂ. അല്ലെങ്കിലും ഇവിടെ കോക്കസ് ഉണ്ട്, താപ്പാനകളുണ്ട്. അതുകൊണ്ട് എല്ലാവരും ഒന്നിച്ചു നിന്നേ പറ്റൂ. അത് ചിലരെ അസ്വസ്ഥമാക്കുന്നെങ്കില്‍ ആക്കട്ടെയെന്നും താരം പറഞ്ഞു. തനിക്കും സമാനമായ അനുഭവം നേരിടേണ്ടി വന്ന കാര്യവും താരം വ്യക്തമാക്കി. രണ്ടു തവണ എന്നെ ബാന്‍ ചെയ്തിട്ടുണ്ട്. ആദ്യം ടി വി ഷോ ചെയ്യുന്നു എന്നും പറഞ്ഞായിരുന്നു ബാന്‍ ചെയ്തത്.
പിന്നെ ഒരു കാരവന്‍ ചോദിച്ചതിനും വലിയ ഇഷ്യു ഉണ്ടായിട്ടുണ്ട്. അതെന്താണെന്നു വെച്ചാല്‍ ഹീറോയെയും ഹീറോയിനെയും രണ്ടു സമയത്തായിരിക്കും ഷോട്ടിന് വിളിക്കുക. നമ്മള്‍ എത്തിയിട്ടേ ഹീറോയെ വിളിക്കൂ. അതിനെ ഞാന്‍ ചോദ്യം ചെയ്തു. എന്നാല്‍ ‘നിനക്ക് സ്റ്റേറ്റ് അവാര്‍ഡ് കിട്ട്യപ്പോ മുതല് എന്താ ഒരു മാറ്റം?’ എന്ന മറുചോദ്യമാണ് എന്നോടു ചോദിച്ചതെന്നും റിമ പറഞ്ഞു
നമുക്കുള്ള സ്പേസ് തരാത്തതിനെയും ഞാന്‍ ചോദ്യം ചെയ്തിട്ടുണ്ട്. അതുകൊണ്ടുതന്നെ അതെല്ലാം എനിക്ക് ധാരാളം ശത്രുക്കളെയും ഉണ്ടാക്കി തന്നിട്ടുണ്ട്. പലരും എന്നെ ഒതുക്കിയിട്ടുമുണ്ടെന്നും അവര്‍ വ്യക്തമാക്കി.
