മുന്നിൽ മോഹൻലാൽ, ദുൽഖർ സിനിമകൾ: ആദ്യ ദിന കളക്ഷൻ റെക്കോർഡ് പൃഥ്വി സ്വന്തമാക്കുമോ?

നീണ്ട 16 വര്‍ഷങ്ങള്‍ നീണ്ടുനിന്ന സംവിധായകന്‍ ബ്ലെസിയുടെ പ്രയത്‌നങ്ങള്‍ അവസാനിച്ചുകൊണ്ട് ആടുജീവിതം എന്ന സിനിമ ഇന്ന് റിലീസ് ചെയ്തിരിക്കുകയാണ്. നജീബ് എന്ന വ്യക്തി കടന്നുപോയ ജീവിതയാഥാര്‍ഥ്യങ്ങള്‍ സിനിമയാകുമ്പോള്‍ പ്രിഥ്വിരജാണ് സിനിമയില്‍ നജീബെന്ന കഥാപാത്രത്തെ പകര്‍ന്നാടുന്നത്. കേരളത്തിന് പുറമെ ഇന്ത്യയെങ്ങും സിനിമ റിലീസ് ചെയ്യുമ്പോള്‍ സിനിമ മലയാളത്തിലെ ആദ്യ ദിന ബോക്‌സോഫീസ് കളക്ഷന്റെ റെക്കോര്‍ഡുകള്‍ തകര്‍ക്കാന്‍ സാധ്യതയേറെയാണ്.

നിലവില്‍ മോളിവുഡില്‍ ആദ്യ ദിന ഗ്രോസ് കളക്ഷനില്‍ ഒന്നാം സ്ഥാനത്തുള്ളത് മോഹന്‍ലാല്‍ സിനിമയായ മരക്കാര്‍: അറബിക്കടലിന്റെ സിംഹം എന്ന സിനിമയാണ്. 20.40 കോടിയാണ് അന്ന് സിനിമ കളക്ഷന്‍ ചെയ്തത്. മോഹന്‍ലാല്‍ സിനിമയ്ക്ക് പിന്നില്‍ ആദ്യ ദിനം 19.20 കോടി സ്വന്തമാക്കിയ ദുല്‍ഖര്‍ സല്‍മാന്‍ സിനിമയായ കുറുപ്പാണ് രണ്ടാമതുള്ളത്. ആദ്യ ദിനം 18.10 കോടി സ്വന്തമാക്കികൊണ്ട് മോഹന്‍ലാലിന്റെ ഒടിയന്‍ മൂന്നാം സ്ഥാനത്തും 15.50 കോടി ആദ്യ ദിനത്തില്‍ നേടിയ ദുല്‍ഖര്‍ സിനിമ കിംഗ് ഓഫ് കൊത്ത നാലാം സ്ഥാനത്തുമാണ്.

തിയേറ്ററില്‍ വമ്പന്‍ വിജയമായില്ലെങ്കിലും മോഹന്‍ലാല്‍ ലിജോ ജോസ് സിനിമയായ മലൈക്കോട്ടെ വാലിബന്‍ ആദ്യ ദിനത്തീല്‍ 12.27 കോടി രൂപ സ്വന്തമാക്കിയിരുന്നു. പൃഥ്വിരാജ് ബ്ലെസി സിനിമയായ ആടുജീവിതം പ്രീ സെയില്‍ ബിസിനസിലൂടെ തന്നെ 8.5 കോടി സ്വന്തമാക്കിയിരുന്നു. അങ്ങനെയെങ്കില്‍ മലയാളത്തിലെ എല്ലാ ആദ്യ ദിന ബോക്‌സോഫീസ് റെക്കോര്‍ഡുകളും തകര്‍ക്കാന്‍ ആടുജീവിതത്തിനാകും.