'അതൊരു കഴിവോ മിടുക്കോ അല്ല, പ്രോത്സാഹിപ്പിക്കാൻ പാടില്ല'; ജ​ഗതിയുടെ അഭിനയ ശൈലിയെ വിമർശിച്ച് ലാൽ

മലയാള സിനിമയ്ക്ക് ഒഴിച്ചുകൂടാനാകാത്ത, പകരം വെക്കാനില്ലാത്ത അതുല്യ നടനാണ് ജ​ഗതി ശ്രീകുമാർ. ജഗതിക്കൊപ്പം അഭിനയിക്കുമ്പോഴുള്ള അനുഭവം പലരും പറഞ്ഞിട്ടുണ്ട്. അതിൽ എല്ലാവരും കൂട്ടിച്ചേർക്കുന്ന ഒരു കാര്യമാണ്, ഷോട്ടിനിടെ ജഗതി സ്പോട്ടിൽ ചില കാര്യങ്ങളൊക്കെ കയ്യിൽ നിന്നിടുമെന്ന്.

ഇത് സംബന്ധിച്ച് നടനും സംവിധായകനുമായ ലാൽ നടത്തിയ പരാമർശമാണിപ്പോൾ ചർച്ചയാകുന്നത്. ഷോട്ടിനിടെ ചില ഡയലോഗുകളോ മാനറിസങ്ങളോ കയ്യിൽ നിന്ന് ഇട്ട് അഭിനയിക്കുന്ന ജഗതിയുടെ ശൈലിയെക്കുറിച്ചായിരുന്നു ലാലിന്റെ പരാമർശം. സംവിധായകനോട് മുൻകൂട്ടി പറയാതെ ഷോട്ടിൽ കയ്യിൽ നിന്നിട്ട് ചെയ്യുന്നത് പ്രോത്സാഹിപ്പിക്കാൻ കഴിയാത്ത കാര്യമാണെന്ന് ലാൽ പറയുന്നു.

സംവിധായകൻ ചെയ്യാൻ പറഞ്ഞേൽപ്പിക്കുന്നത് മാറ്റുന്നത് നല്ലതല്ലെന്നും അത് ഒപ്പം അഭിനയിക്കുന്ന ആളെ ബുദ്ധിമുട്ടിലാക്കുമെന്നുമായിരുന്നു ലാൽ പറയുന്നത്. ജഗതിക്കൊപ്പം വർക്ക് ചെയ്തവരും മുൻപ് ഇക്കാര്യം പറഞ്ഞിട്ടുണ്ട്. കയ്യിൽ നിന്ന് ചില ഡയലോഗുകൾ ഇടുമ്പോൾ അതിനനുസരിച്ച് ബാക്കി കാര്യങ്ങൾ ചെയ്യാൻ നമ്മൾ പ്ലാൻ ചെയ്തിട്ട് വേണം അദ്ദേഹത്തിനൊപ്പം അഭിനയിയ്ക്കാൻ ഇറങ്ങാൻ എന്ന് പലരും മുൻപ് പറഞ്ഞിട്ടുണ്ട്. ലാലിനെ അനുകൂലിച്ചും വിയോജിപ്പ് രേഖപ്പെടുത്തിയും നിരവധി പേരാണ് രംഗത്തെത്തുന്നത്. ‘കേരള ക്രൈം ഫയല്‍സ്’ എന്ന വെബ് സീരിസിന്റെ പ്രൊമോഷനുമായി ബന്ധപ്പെട്ട് സൈന പ്ലസിന് നൽകിയ അഭിമുഖത്തിലായിരുന്നു ലാലിന്റെ പരാമർശം.

‘‘അമ്പിളിച്ചേട്ടനെപറ്റി പറയുമ്പോൾ ഏറ്റവും കൂടുതൽ പറയുന്ന ഒരു കാര്യമാണ്, പുള്ളി ഷോട്ട് എടുക്കുമ്പോൾ ഒട്ടും പ്രതീക്ഷിക്കാതെ ചില ഡയലോഗ് പറയും, ചില ചലനങ്ങൾ ഇടും. അതൊട്ടും പ്രോത്സാഹിപ്പിക്കാൻ പാടില്ലാത്ത കാര്യമാണ്. അങ്ങനെ ചെയ്യാനേ പാടില്ല. അങ്ങനെ ചെയ്തു കഴിഞ്ഞാൽ സംവിധായകൻ നിർബന്ധമായും പറയണം, ഒന്നുകിൽ അതു പറഞ്ഞിട്ട് ചെയ്യണമായിരുന്നു എന്നു പറയണം അല്ലെങ്കിൽ നന്നായിരുന്നു, അതുകൊണ്ട് ഓക്കെ എന്നു പറയണം.

അതല്ലെങ്കിൽ അതു വേണ്ട എന്നു പറഞ്ഞ് മാറ്റണം. അതല്ലാതെ അതൊരു കഴിവായിട്ടും മിടുക്കായിട്ടും വയ്ക്കുന്നത് ഒട്ടും ശരിയായിട്ടുള്ള കാര്യമല്ല. അത് ഏത് വലിയ നടനാണെങ്കിലും. അത് ആ സീനിനെ ബാധിക്കുമോ എന്നുള്ളതിനേക്കാൾ ഉപരിയായി കൂടെ നിൽക്കുന്ന ആർട്ടിസ്റ്റുകൾ ഉണ്ട്. നമ്മൾ ഒരു കാര്യം തീരുമാനിച്ച് ഉറപ്പിച്ചാണ് പോയിരിക്കുന്നത്.

ഇയാൾ പറഞ്ഞു നിർത്തുന്ന ഡയലോഗിന്റെ അവസാന വാക്ക് ഇതാണ്, ആ വാക്ക് ബന്ധപ്പെട്ടായിരിക്കും ചിലപ്പോൾ ഞാൻ ഡയലോഗ് പറയേണ്ടത്. ആ കണക്ഷൻ നഷ്ടപ്പെട്ടു കഴിഞ്ഞാൽ നമുക്കത് പറയാൻ ബുദ്ധിമുട്ടാകും. ചിലപ്പോൾ നമ്മൾ പറഞ്ഞു ഒപ്പിക്കുമായിരിക്കും. പക്ഷേ അത് നമ്മുടെ പറഞ്ഞൊപ്പിക്കലാകും. അപ്പോൾ ദുർബലം ആകുന്നത് ഈ നടനാണ്. അദ്ദേഹം അവിടെ ജയിക്കും. ഇവിടെ ഒരാൾ അതിനൊപ്പം പരാജയപ്പെടും. അതുകൊണ്ട് അതൊട്ടും ശരിയായിട്ടുള്ള കാര്യമല്ല. ഈ സ്വന്തമായി അല്ലെങ്കിൽ സ്പൊണ്ടേനിയസ് ആയി ഇടുക എന്നു പറയുന്നത് ഒട്ടും നല്ല ലക്ഷണമല്ല.’’, ലാൽ പറഞ്ഞു.