'10 മണിക്കൂർ ജോലി ന്യായമാണ്, അസാധ്യമല്ല': ജനീലിയ ദേശ്മുഖ്

ഒരു ദിവസം 10 മണിക്കൂർ ജോലി ചെയ്യുക എന്നത് അസാധ്യമല്ലെന്ന് നടി ജനീലിയ ദേശ്മുഖ് പറഞ്ഞു.

സന്ദീപ് റെഡ്ഡി വാങ്ക സംവിധാനം ചെയ്യുന്ന സ്പിരിറ്റ് എന്ന ചിത്രത്തിൽ അഭിനയിക്കുന്നതിനായി ദീപിക പദുക്കോൺ ഉന്നയിച്ച ഡിമാന്റുകളിൽ ഒന്നായിരുന്നു 8 മണിക്കൂർ ജോലി എന്നത്. എന്നാൽ, സംവിധായകൻ ഇത് അംഗീകരിക്കാതെ നായികയെ മാറ്റുകയായിരുന്നു. ഇതോടെ, ഇത് സംബന്ധിച്ച ചർച്ചകൾ ബോളിവുഡിൽ ആരംഭിച്ചു. ഒരു ദിവസം 10 മണിക്കൂർ ജോലി ചെയ്യുക എന്നത് അസാധ്യമല്ലെന്ന് നടി ജനീലിയ ദേശ്മുഖ് പറഞ്ഞു. സൂം ചാനലിനോട് സംസാരിക്കവേയാണ് ദീർഘനേരം ജോലിചെയ്യേണ്ടിവരുന്ന സാഹചര്യം ജനീലിയ വെളിപ്പെടുത്തിയത്.

'10 മണിക്കൂർ ജോലി കഠിനമാണ്, പക്ഷേ അസാധ്യമല്ല. ഒരു ദിവസം 10 മണിക്കൂർ ജോലി ചെയ്യാറുണ്ട്, ചില ദിവസങ്ങളിൽ സംവിധായകൻ അത് 11 അല്ലെങ്കിൽ 12 മണിക്കൂർ വരെ നീട്ടാൻ ആവശ്യപ്പെടാറുണ്ട്. ഇത് ന്യായമാണെന്ന് ഞാൻ കരുതുന്നു. പക്ഷേ അതിനനുസരിച്ചുള്ള മാറ്റങ്ങൾ വരുത്താൻ സമയം ലഭിക്കണം. ഒന്നോ രണ്ടോ ദിവസങ്ങളിൽ കൂടുതൽ സമയം ജോലി ചെയ്യേണ്ടി വരുമ്പോൾ അതൊരു ധാരണയുടെ ഭാഗമായി ചെയ്യേണ്ടിവരും' - ജനീലിയ പറഞ്ഞു.

അതേസമയം, പ്രഭാസ് നായകനായി ഒരുങ്ങുന്ന സ്പിരിറ്റിൽ  തൃപ്തി ഡിമ്രിയാണ് പുതിയ നായിക. 8 മണിക്കൂർ ഷിഫ്റ്റിന് പുറമെ, 20 കോടി പ്രതിഫലവും സിനിമയുടെ ലാഭ വിഹിതവും ദീപിക പദുക്കോൺ ആവശ്യപ്പെട്ടുവെന്നായിരുന്നു പുറത്തുവന്ന റിപ്പോർട്ട്. കൂടാതെ താൻ തെലുങ്കിൽ ഡയലോഗുകൾ പറയില്ല എന്നും നടി പറഞ്ഞതായും ഈ ഡിമാന്റുകൾ അംഗീകരിക്കാൻ സ്പിരിറ്റ് ടീം തയ്യാറായില്ല എന്നുമാണ് പറയപ്പെടുന്നത്. ഇതിന് പിന്നാലെ, ദീപികയ്ക്ക് നേരെ കടുത്ത സൈബർ ആക്രമണമാണ് ഉണ്ടായത്.