ഇന്ത്യൻ 2 റിലീസിന് മുൻപെ പഴയ ഇന്ത്യൻ സിനിമ അങ്ങ് ഇറക്കിവിടും, ബോക്സോഫീസ് പിടിക്കാൻ കമൽഹാസൻ

2024ൽ ഇന്ത്യന്‍ സിനിമാലോകം തന്നെ ഏറെ ആകാംക്ഷയോടെ കാത്തിരിക്കുന്ന സിനിമയാണ് ശങ്കര്‍- കമല്‍ഹാസന്‍ കൂട്ടുക്കെട്ടില്‍ ഒരുങ്ങുന്ന ഇന്ത്യന്‍ 2. 1996ല്‍ ഇറങ്ങി ഇന്ത്യയെങ്ങും വമ്പന്‍ വിജയമായ ഇന്ത്യന്‍ എന്ന സിനിമയുടെ രണ്ടാം ഭാഗമായതിനാല്‍ തന്നെ വലിയ പ്രതീക്ഷയാണ് സിനിമയെ പറ്റിയുള്ളത്. 2019ല്‍ ചിത്രീകരണം ആരംഭിച്ചിരുന്നെങ്കിലും പല തടസങ്ങള്‍ കൊണ്ടും സിനിമയുടെ റിലീസ് നീണ്ടുപോകുകയായിരുന്നു. ജൂണ്‍ മാസത്തിലാകും സിനിമയുടെ റിലീസെന്നാണ് അറിയുന്നത്. എന്നാല്‍ റിലീസ് തിയ്യതിയും മറ്റും അണിയറപ്രവര്‍ത്തകര്‍ പുറത്തുവിട്ടിട്ടില്ല.

 പുതിയ റിപ്പോര്‍ട്ടുകള്‍ പ്രകാരം സിനിമ ജൂലൈയിലാകും റിലീസ് ചെയ്യുക എന്നാണ് അറിയുന്നത്. അതേസമയം ജൂണ്‍ മാസത്തില്‍ 1996ല്‍ റിലീസായ പഴയ ഇന്ത്യന്‍ സിനിമയുടെ റിലീസ് ഉണ്ടാകുമെന്നാണ് തമിഴകത്ത് നിന്നും വരുന്ന റിപ്പോര്‍ട്ട്. അടുത്തിടെയായി വിജയുടെ സൂപ്പര്‍ ഹിറ്റ് സിനിമയായ ഗില്ലിയും അജിത്തിന്റെ ബില്ലയുമെല്ലാം തമിഴ്നാട്ടില്‍ റി റിലീസ് ചെയ്തിരുന്നു. സിനിമയുടെ രണ്ടാം ഭാഗത്തിന്റെ റിലീസിന് മുന്‍പ് ആദ്യഭാഗം കാണാന്‍ അവസരം ഒരുക്കിയാല്‍ അത് നേട്ടമാകുമെന്നാണ് സിനിമയുടെ വിതരണക്കാരായ റെഡ് ജയന്‍്‌സും കരുതുന്നത്. ബിഗ് ബജറ്റില്‍ ഒരുങ്ങുന്ന ഇന്ത്യന്‍ 2 നിര്‍മ്മിക്കുന്നത് സുഭാസ്‌കരന്‍ അല്ലിരാജയുടെ ലൈക്ക പ്രൊഡക്ഷന്‍സും കമല്‍ ഹാസന്റെ രാജ്കമല്‍ ഫിലിംസും ഉദയനിധി സ്റ്റാലിന്റെ റെഡ് ജയന്റ് മൂവീസും ചേര്‍ന്നാണ്.