മഞ്‌ജു വാര്യരുടെ ഹൊറര്‍ ത്രില്ലര്‍ 'ചതുർമുഖം' തിയേറ്ററുകളിലേക്ക്

ലോക്ക് ഡൗണിനു ശേഷം റിലീസിന് എത്തുന്ന ആദ്യ മഞ്ജു വാര്യർ ചിത്രമാകാൻ ചതുർമുഖം. നിരവധി ചിത്രങ്ങളാണ് നടിയുടെതായി പുറത്തുവരാനിരിക്കുന്നത്. ജാക്ക് ആൻഡ് ജിൽ, പടവെട്ട്, ദ പ്രീസ്റ്റ്, മരയ്ക്കാർ അറബിക്കടലിന്റെ സിംഹം തുടങ്ങിയ മഞ്ജു ചിത്രങ്ങൾ ഉടൻ തന്നെ റിലീസ് പ്രഖ്യാപിക്കും. ആ കൂട്ടത്തിൽ ആദ്യം റിലീസിനെത്തുന്നത് ചതുർമുഖം ആണ്.

ഫെബ്രുവരിയിൽ ചിത്രം തിയേറ്ററുകളിലെത്തുമെന്ന് നിർമ്മാതാക്കൾ അറിയിച്ചു. സണ്ണി വെയ്‌നും മഞ്ജു വാര്യരും ആദ്യമായി ഒന്നിക്കുന്ന സിനിമയ്ക്കായി കാത്തിരിക്കുകയാണ് ആരാധകരും. രഞ്ജിത് കമല ശങ്കറും സലീൽ വിയും ചേർന്നാണ് ഈ ഹൊറർ ത്രില്ലർ ചിത്രം സംവിധാനം ചെയ്യുന്നത്. അഭയകുമാര്‍ കെ, അനില്‍ കുര്യന്‍ എന്നിവര്‍ ചേര്‍ന്നാണ് തിരക്കഥ ഒരുക്കിയിരിക്കുന്നത്.

ജിസ്ടോംസ് മൂവീസിന്റെ ബാനറില്‍ ജിസ്സ് ടോംസും ജസ്റ്റിന്‍ തോമസും ചേര്‍ന്നാണ് നിര്‍മ്മിക്കുന്നത്. അഭിനന്ദ് രാമാനുജനാണ് ഛായാഗ്രഹണം നിർവഹിക്കുന്നത്.