ആരാധകരുടെ അക്കൗണ്ടിലേക്ക് 5000 രൂപ വീതം ധനസഹായം നൽകി വിജയ്!

കൊവിഡ് 19നെ തുടർന്നുണ്ടായ ലോക്ക് ഡൗണിൽ പെട്ട് നിരവധി പേരുടെ ഉപജീവനമാർഗം സ്തംഭിച്ചിരുന്നു. ലോക്ക്ഡൗണില്‍ ദുരിതത്തിലായവരുടെ അക്കൗണ്ടുകളിലേക്ക് നടന്‍ വിജയ് പണമയയ്ക്കുന്നുവെന്ന് ആരാധകര്‍. കടുത്ത പ്രയാസത്തിലായ ആരാധകരുടെ അക്കൗണ്ടുകളിലേക്ക് 5000 രൂപ വീതം നടന്‍ അയച്ചുവെന്നാണ് റിപ്പോര്‍ട്ട്. പണം അക്കൗണ്ടില്‍ നിക്ഷേപിക്കപ്പെട്ട സന്ദേശത്തിന്റെ സ്‌ക്രീന്‍ഷോട്ടടക്കം ആരാധകര്‍ സമൂഹ മാധ്യമങ്ങളില്‍ പങ്കുവെയ്ക്കുന്നുണ്ട്. 

വിജയ് ഫാന്‍സ് അസോസിയേഷൻ ഇടപെട്ടാണ് ഇത്തരത്തിൽ ഒരു പ്രവർത്തനം നടത്തുന്നതെന്നും റിപ്പോർട്ട് ഉണ്ട്. ഫാൻസ് അസോസിയേഷൻ വ്യക്തമായ റിപ്പോർട്ട് നൽകി അടിയന്തരമായി സഹായമെത്തിക്കേണ്ടവരുടെ വിശദാംശങ്ങള്‍ നടന് ലഭ്യമാക്കുന്നു. ഇതിന്റെ പശ്ചാത്തലത്തിലാണ് അവശ്യക്കാരുടെ അക്കൗണ്ടിലേക്ക് പണം അയക്കുന്നതെന്നും റിപ്പോര്‍ട്ടുണ്ട്.

അവശ്യവസ്തുക്കള്‍ ഉള്‍പ്പെടെയെത്തിച്ച് പാവപ്പെട്ടവരെ സഹായിക്കണമെന്ന് ഫാന്‍സ് ക്ലബ്ബുകള്‍ക്ക് നടന്‍ നിര്‍ദേശം നല്‍കിയതായും തമിഴ്മാധ്യമങ്ങള്‍ റിപ്പോര്‍ട്ട് ചെയ്യുന്നു. കൊവിഡിന്റെ പശ്ചാത്തലത്തില്‍ നടന്‍ ഇതുവരെ 1.3 കോടി രൂപയുടെ ധനസഹായം ലഭ്യമാക്കിയിട്ടുണ്ട്. അതിന് പുറമെയാണ് അക്കൗണ്ടുകളിലേക്ക് നേരിട്ട് പണമെത്തിക്കുന്നതെന്നാണ് റിപ്പോര്‍ട്ട്.