കുറഞ്ഞ മുതല്‍മുടക്കിലെത്തി ആഗോളബോക്‌സോഫീസില്‍ നിന്നും 2000 കോടിയിലധികം കളക്ഷന്‍ നേടിയ സിനിമയാണ് നിതീഷ് തിവാരിയുടെ സംവിധാനത്തില്‍ ആമിര്‍ ഖാന്‍ നായകനായെത്തിയ ദംഗല്‍ എന്ന സിനിമ. 2016ല്‍ പുറത്തിറങ്ങിയ ബയോഗ്രഫിക്കല്‍ സ്‌പോര്‍ട്‌സ് ഡ്രാമ ഗുസ്തി പരിശീലകനായ മഹാവീര്‍ സിങ്ങിന്റെയും മക്കളുടെയും കഥയാണ് പറഞ്ഞത്. സിനിമ 2000 കോടിയിലധികം രൂപ സ്വന്തമാക്കിയപ്പോള്‍ കുടുംബത്തിന് ഇതില്‍ നിന്നും ഒരു കോടി രൂപ മാത്രമാണ് ലഭിച്ചതെന്ന് വെളിപ്പെടുത്തിയിരിക്കുകയാണ് മഹാവീര്‍ സിങ്ങിന്റെ മകളും ദേശീയ ഗുസ്തി താരവുമായ ബബിത ഫോഗട്ട്.
ഒരു സ്വകാര്യ ചാനലിന് അനുവദിച്ച അഭിമുഖത്തിലാണ് ബബിത ഇക്കാര്യം പറഞ്ഞത്. ദംഗല്‍ നിര്‍മാതാക്കളില്‍ നിന്നും എത്ര രൂപ നിങ്ങള്‍ക്ക് ലഭിച്ചു എന്ന ചോദിച്ചപ്പൊള്‍ കളക്ഷന്റെ ഒരു ശതമാനത്തില്‍ താഴെ ലഭിച്ചെന്നായിരുന്നു ബബിതയുടെ മറുപടി. അപ്പോള്‍ 20 കോടി ലഭിച്ചോ എന്ന ചോദ്യത്തിന് ഇല്ലെന്നും ഏകദേശം ഒരു കോടി രൂപയാണ് ലഭിച്ചതെന്നും ബബിത മറുപടി പറഞ്ഞു. എന്റെ പിതാവ് മഹാവീര്‍ സിങ്ങിന് ഒരൊറ്റ ആവശ്യമെ ഉണ്ടായിരുന്നുള്ളു. ജനങ്ങളുടെ ആദരവും സ്‌നേഹവും മറ്റെല്ലാം വിട്ടേക്കാനായിരുന്നു അദ്ദേഹം പറഞ്ഞത്. ആമിറിന്റെ നിര്‍മാണ ടീം ആദ്യം കഥാപാത്രങ്ങളുടെ പേരുകള്‍ മാറ്റാന്‍ പറഞ്ഞെങ്കിലും അച്ഛന്‍ വഴങ്ങിയില്ല. ബബിത പറഞ്ഞു.
