മാത്യുവിനോട് പിതാവ് ചെയ്ത തെറ്റ് ഞാന്‍ നിന്നോട് ചെയ്യില്ല; സ്വവര്‍ഗാനുരാഗിയായ മകനോട് അമ്മയുടെ വാക്കുകള്‍
തമിഴ്‌നാട് സ്വദേശിയായ സ്വവര്‍ഗാനുരാഗിയും ക്വീര്‍ ഫെമിനിസ്റ്റ്, ആക്ടിവിസ്റ്റ് എന്നീ നിലകളിലും ശ്രദ്ധേയനാണ്
മമ്മൂട്ടിയും ജ്യോതികയും കേന്ദ്ര കഥാപാത്രങ്ങളെ അവതരിപ്പിച്ച കാതല്‍: ദി കോറിന് ഒ.ടി.ടി. റിലീസിനു ശേഷവും പ്രശംസ. മലയാളത്തിനു പുറത്തുനിന്നുള്ള നിരവധി സിനിമാ പ്രേക്ഷകരാണ് എക്‌സ് പ്ലാറ്റ്‌ഫോമില്‍ കാതലിനെ പ്രശംസിച്ചും സംവിധായകന്‍ ജിയോ ബേബിക്ക് നന്ദി പറഞ്ഞും എത്തിയിരിക്കുന്നത്. ഇപ്പോള്‍ ഇതാ സ്വവര്‍ഗാനുരാഗിയായ ഒരു യുവാവ് കാതല്‍ കണ്ട ശേഷം കുറിച്ച വരികളാണ് വലിയ രീതിയില്‍ സോഷ്യല്‍ മീഡിയ ഏറ്റെടുത്തിരിക്കുന്നത്.
മമ്മൂട്ടിയുടെ കഥാപാത്രമായ മാത്യു എന്ന കഥാപാത്രത്തോട് അദ്ദേഹത്തിന്റെ പിതാവ് ചെയ്ത തെറ്റ് തന്നോട് ചെയ്യില്ലെന്ന് കാതല്‍ കണ്ട ശേഷം അമ്മ പറഞ്ഞെന്നാണ് ശ്രീ കൃഷ്ണ എന്ന യുവാവ് എഴുതിയിരിക്കുന്നത്.
'എന്റെ അമ്മ കാതല്‍ ദി കോര്‍ കണ്ട ശേഷം എന്നെ വിളിച്ചു. ആശ്വസിപ്പിക്കാന്‍ പോലും കഴിയാത്ത വിധം കരഞ്ഞുകൊണ്ട് എന്നോട് പറഞ്ഞു, ' മാത്യുവിനോട് അയാളുടെ പിതാവ് ചെയ്ത തെറ്റ് ഞാന്‍ ഒരിക്കലും നിന്നോട് ചെയ്യില്ല'..അതാണ് യാഥാര്‍ഥ്യം. ഈ സിനിമ എന്റെ അമ്മയില്‍ തിരിച്ചറിവ് ഉണ്ടാക്കി. ജിയോ ബേബിക്ക് നന്ദി' എന്നാണ് ശ്രീകൃഷ്ണ എക്‌സ് പ്ലാറ്റ്‌ഫോമില്‍ കുറിച്ചത്. ഒരു സിനിമ കണ്ട് താന്‍ ഇത്രയേറെ കരഞ്ഞിട്ടില്ലെന്നും കൃഷ്ണ പറഞ്ഞു.
തമിഴ്‌നാട് സ്വദേശിയായ ശ്രീ കൃഷ്ണ സ്വവര്‍ഗാനുരാഗിയും ക്വീര്‍ ഫെമിനിസ്റ്റ്, ആക്ടിവിസ്റ്റ് എന്നീ നിലകളിലും ശ്രദ്ധേയനാണ്.
