ഹരികൃഷ്ണന്‍സില്‍ ആരാണ് മികച്ചത്? ഒടുവില്‍ ഫാസിലിന്റെ മറുപടി ഇങ്ങനെ

ഹരികൃഷ്ണന്‍സില്‍ ആരാണ് മികച്ച പ്രകടനം നടത്തിയത്? മമ്മൂട്ടി, മോഹന്‍ലാല്‍ ആരാധകര്‍ക്കിടയില്‍ ഇന്നും ഈ ചര്‍ച്ച സജീവമാണ്. എന്നാല്‍, ഹരികൃഷ്ണന്‍സിന്റെ സംവിധായകന്‍ ഫാസിലിന് ഇക്കാര്യത്തില്‍ കൃത്യമായ മറുപടിയുണ്ട്. 

ഹരികൃഷ്ണന്‍സില്‍ തന്റെ മനസ് മമ്മൂട്ടിക്കൊപ്പമാണെന്നാണ് ഫാസില്‍ പറയുന്നത്. മോഹന്‍ലാലിന് എളുപ്പത്തില്‍ വഴങ്ങുന്ന ഹ്യൂമര്‍ രംഗങ്ങളാണ് ഹരികൃഷ്ണന്‍സില്‍ ഉള്ളത്. മോഹന്‍ലാല്‍ കാണിക്കുന്ന ഹ്യൂമര്‍ കോപ്രായങ്ങള്‍ക്ക് മുന്നില്‍ മമ്മൂട്ടി കട്ടയ്ക്ക് പിടിച്ചുനിന്നു എന്നാണ് ഫാസില്‍ പറയുന്നത്. അക്കാലത്ത് മമ്മൂട്ടി അത്രയധികം ഹ്യൂമര്‍ വേഷങ്ങള്‍ ചെയ്തിരുന്നില്ല. അതുകൊണ്ട് തന്നെ മോഹന്‍ലാലിന് വേണ്ടി എഴുതിയ കഥയില്‍ ഇത്തരം രംഗങ്ങള്‍ മമ്മൂട്ടി എങ്ങനെ ചെയ്യുമെന്ന് ഫാസിലിന് ടെന്‍ഷനുണ്ടായിരുന്നു. എന്നാല്‍, ഹരി എന്ന കഥാപാത്രത്തെ മമ്മൂട്ടി ഗംഭീരമാക്കിയെന്നാണ് ഫാസിലിന്റെ അഭിപ്രായം. 

മോഹന്‍ലാലിനെ മാത്രം ഉദ്ദേശിച്ചാണ് ഹരികൃഷ്ണന്‍സിന്റെ കഥ ഫാസില്‍ ആദ്യം തയ്യാറാക്കിയത്. മോഹന്‍ലാലിന് എളുപ്പത്തില്‍ കൈകാര്യം ചെയ്യാന്‍ സാധിക്കുന്ന ഹ്യൂമര്‍ രംഗങ്ങള്‍ക്ക് പ്രാധാന്യം നല്‍കിയാണ് ഫാസില്‍ തിരക്കഥയൊരുക്കിയത്. പിന്നീടാണ് മോഹന്‍ലാലിനൊപ്പം മമ്മൂട്ടിയെയും സിനിമയില്‍ ഉള്‍ക്കൊള്ളിക്കാന്‍ ഫാസില്‍ ആലോചിക്കുന്നത്. 

മമ്മൂട്ടിക്ക് കൊടുക്കാന്‍ പറ്റിയ കഥാപാത്രം ഈ സ്റ്റോറിയില്‍ ഉണ്ടായിരുന്നില്ല. അതുകൊണ്ട്, നായകനെ രണ്ടായി മുറിച്ച് രണ്ട് കഥാപാത്രങ്ങളാക്കുകയായിരുന്നു. പ്രണവത്തിന്റെ കഥയില്‍ മോഹന്‍ലാലിനൊപ്പം മമ്മൂട്ടിയും കൂടി അഭിനയിച്ചാല്‍ നന്നായിരുന്നു എന്ന് മമ്മൂട്ടിയോട് ഫാസില്‍ പറഞ്ഞു. 'എന്തിന്? ഞങ്ങളെ അങ്ങനെ ഉരച്ചുനോക്കേണ്ട കാര്യമൊന്നുമില്ല' എന്ന് മമ്മൂട്ടി അന്ന് പറഞ്ഞില്ല, അതുകൊണ്ടാണ് ഹരികൃഷ്ണന്‍സ് യാഥാര്‍ത്ഥ്യമായത് എന്ന് ഫാസില്‍ ഈയിടെ ഒരു അഭിമുഖത്തില്‍ വെളിപ്പെടുത്തിയിരുന്നു. 

മമ്മൂട്ടിയും മോഹന്‍ലാലും മത്സരിച്ച് അഭിനയിച്ച സിനിമയാണ് ഹരികൃഷ്ണന്‍സ്. ഫാസില്‍ സംവിധാനം ചെയ്ത ഹരികൃഷ്ണന്‍സ് 1998 ലാണ് റിലീസ് ചെയ്തത്. മമ്മൂട്ടി, മോഹന്‍ലാല്‍ എന്നിവര്‍ക്ക് പുറമേ ജൂഹി ചൗള, കുഞ്ചാക്കോ ബോബന്‍, നെടുമുടി വേണു, ഇന്നസെന്റ് തുടങ്ങിയ പ്രമുഖ താരങ്ങളും ഹരികൃഷ്ണന്‍സില്‍ അഭിനയിച്ചു. ഹരികൃഷ്ണന്‍സ് റിലീസ് ചെയ്തിട്ട് ഇന്നേക്ക് 23 വര്‍ഷമായി.