അടുത്തിടെ മലയാള സിനിമയില്‍ പിറന്ന ഏറ്റവും വലിയ വിജയ ചിത്രങ്ങളില്‍ ഒന്നാണ് ഹോം. ഇന്ദ്രന്‍സ് എന്ന നടനിലെ പ്രതിഭയെ ഒരിക്കല്‍ കൂടി സിനിമാ ലോകം അടുത്തറിഞ്ഞു. ഇപ്പോഴിതാ ഹോം ഹിന്ദിയിലേക്ക്. പ്രമുഖ നിര്‍മാണക്കമ്പനിയായ അബന്‍ടന്‍ഷ്യ എന്റര്‍ടെയ്ന്‍മെന്റും ഫ്രൈഡേ ഫിലിം ഹൗസും ചേര്‍ന്നാണ് ചിത്രം ബോളിവുഡില്‍ നിര്‍മ്മിക്കുക.
ഷെര്‍ണി, ശകുന്തള ദേവി, എയര്‍ലിഫ്റ്റ്, ടോയ്ലറ്റ് ഏക് പ്രൈം കഥ, ഷെഫ്, നൂര്‍, ബ്രീത്,ബ്രീത് ഇന്‍ടു ദി ഷാഡോസ് തുടങ്ങിയ ചിത്രങ്ങള്‍ നിര്‍മ്മിച്ചത് അബന്‍ടന്‍ഷ്യ എന്റര്‍ടെയ്ന്‍മെന്റാണ്.
'വിജയ് ബാബുവിന്റെ ഫ്രൈഡേ ഫിലിം ഹൗസുമായി ഞങ്ങള്‍ കൈകോര്‍ത്ത് നിരൂപക പ്രശംസ നേടിയ മലയാള ചിത്രം ഹോം ഹിന്ദിയില്‍ റീമേക്ക് ചെയ്യുന്നതില്‍ സന്തോഷിക്കുന്നു. അങ്കമാലി ഡയറീസ് എന്ന സിനിമയുടെ ഹിന്ദി റീമേക്കിന് ശേഷം ഫ്രൈഡേ ഫിലിം ഹൗസുമായി വീണ്ടും സഹകരിക്കുന്നതില്‍ ആവേശമുണ്ട്.'-അബന്‍ടന്‍ഷ്യ എന്റര്‍ടെയ്ന്‍മെന്റ് കുറിച്ചു.
ഒലിവര്‍ ട്വിസ്റ്റും കുട്ടിയമ്മയുമായി എത്തിയത് ഇന്ദ്രന്‍സും മഞ്ജു പിള്ളയുമാണ്. ഇരുവരും മികച്ച പ്രകടനമാണ് കാഴ്ചവെച്ചത്.മണിയന്‍ പിള്ള രാജു, വിജയ് ബാബു, ജോണി ആന്റണി, ശ്രീകാന്ത് മുരളി, എന്നിവരാണ് മറ്റു അഭിനേതാക്കള്‍. ഫിലിപ്‌സ് ആന്റ് ദ മങ്കിപെന്‍' എന്ന ചിത്രത്തിന്റെ സംവിധായകരിലൊരാളായ റോജിന്‍ തോമസാണ് ഈ സിനിമയ്ക്ക് തിരക്കഥയൊരുക്കി സംവിധാനം ചെയ്തിരിക്കുന്നത്.
