രാജാവിനെക്കാള്‍ മുകളില്‍, ദൈവത്തിന് താഴെ - ലൂസിഫര്‍ രണ്ടാം ഭാഗം “എമ്പുരാന്‍”!

ലൂസിഫര്‍ രണ്ടാം ഭാഗത്തിന് എമ്പുരാന്‍ എന്ന് പേരിട്ടു. പൃഥ്വിരാജ് സംവിധാനം ചെയ്യുന്ന ചിത്രത്തിന് മുരളി ഗോപിയാണ് തിരക്കഥ. ആദ്യചിത്രത്തില്‍ സ്റ്റീഫന്‍ നെടുമ്പള്ളി എന്ന കഥാപാത്രത്തിനായിരുന്നു മുന്‍‌തൂക്കമെങ്കില്‍ രണ്ടാം ഭാഗത്തില്‍ ഖുറേഷി അബ്രാം എന്ന കഥാപാത്രത്തെ മുന്‍‌നിര്‍ത്തിയായിരിക്കും കഥ പോകുന്നത്.

ലൂസിഫറിന്‍റെ ക്ലൈമാക്സ് രംഗത്തോട് ചേര്‍ന്ന് രണ്ടാം ഭാഗത്തിന്‍റെ പേര് അവതരിപ്പിച്ചുകൊണ്ടുള്ള ടീസര്‍ പൃഥ്വിരാജ് പുറത്തുവിട്ടു. ആശീര്‍വാദ് പ്രൊഡക്ഷന്‍സിന്‍റെ ബാനറില്‍ ആന്‍റണി പെരുമ്പാവൂര്‍ തന്നെയാണ് ചിത്രം നിര്‍മ്മിക്കുന്നത്.

ലൂസിഫറിനേക്കാള്‍ വലിയ ബജറ്റില്‍ ഒരുങ്ങുന്ന സിനിമയുടെ ഛായാഗ്രാഹണം സുജിത് വാസുദേവ് തന്നെയായിരിക്കും. പൂര്‍ണമായും ഒരു അധോലോക കഥ പറയുന്ന ചിത്രം ഒട്ടേറെ വിദേശരാജ്യങ്ങളിലായി ചിത്രീകരണം പൂര്‍ത്തിയാക്കും. 
സ്റ്റീഫന്‍ നെടുമ്പള്ളി എന്ന കഥാപാത്രവും ആ കഥാപാത്രം ചെന്നുപെട്ട സാഹചര്യങ്ങളും ഈ ഫ്രാഞ്ചൈസിയിലെ ഒരു ചെറിയ ഏടാണ്. ലൂസിഫര്‍ എന്ന കഥയ്ക്ക് മുമ്പും അതിന് ശേഷവുമുള്ള കഥയായിരിക്കും എമ്പുരാന്‍ പറയുന്നത്. 
എല്‍ 2 അവതരിപ്പിച്ചുകൊണ്ടുള്ള വാര്‍ത്താസമ്മേളനത്തില്‍ മോഹന്‍ലാല്‍, പൃഥ്വിരാജ്, ആന്‍റണി പെരുമ്പാവൂര്‍, മുരളി ഗോപി എന്നിവര്‍ പങ്കെടുത്തു.