ഇനി കേരളത്തിൽ നടക്കുന്ന തമിഴ് സിനിമ, നായികയായി മമിത: റിബൽ ട്രെയ്‌ലർ

Rebel Movie Trailer

തമിഴ്‌നാട് പ്രധാന കഥാപശ്ചാത്തലമാകുന്ന മലയാള സിനിമയായ മഞ്ഞുമ്മല്‍ ബോയ്‌സ് കേരളത്തിനൊപ്പം തമിഴ്‌നാട്ടിലും തകര്‍ത്തോടുകയാണ്. തമിഴ് പശ്ചാത്തലവും ഗുണ സിനിമയ്ക്ക് നല്‍കുന്ന ട്രിബ്യൂട്ടും ഒപ്പം സൗഹൃദത്തെ ചുറ്റിപറ്റിയുള്ള കഥയുമാണ് മഞ്ഞുമ്മല്‍ ബോയ്‌സിനെ തമിഴകം ഏറ്റെടുക്കുന്നതിന് കാരണമായത്. ഇപ്പോഴിതാ കേരളം പശ്ചാത്തലമാക്കി കഥ പറയാന്‍ ഒരുങ്ങുകയാണ് ഒരു തമിഴ് സിനിമ.

ജി വി പ്രകാശ് കുമാറിനെ നായകനാക്കി നവാഗതനായ നികേഷ് ആര്‍ എസ് സംവിധാനം ചെയ്യുന്ന റിബലാണ് കേരളത്തെ പ്രധാന കഥാ പശ്ചാത്തലമാക്കി കഥ പറയുന്നത്. പ്രേമലു എന്ന സിനിമയിലൂടെ തെന്നിന്ത്യയിലാകെ ശ്രദ്ധ നേടിയ മമിത ബൈജുവാണ് ചിത്രത്തിന്റെ നായിക. ഇപ്പോഴിതാ സിനിമയുടെ ട്രെയ്‌ലര്‍ പുറത്തുവിട്ടിരിക്കുകയാണ് അണിയറപ്രവര്‍ത്തകര്‍.

കേരളത്തിലെ ഒരു കോളേജില്‍ പഠിക്കാനെത്തുന്ന തമിഴ് യുവാവായാണ് കെ വി പ്രകാശ് കുമാര്‍ സിനിമയില്‍ അവതരിപ്പിക്കുന്നത്. റൊമാന്റിക് ട്രാക്കുണ്ടെങ്കിലും കേരളത്തിലെ കോളേജുകളില്‍ തമിഴ് യുവാക്കള്‍ നേരിടുന്ന അപരത്വമാണ് സിനിമയുടെ പ്രമേയം. ഒപ്പം ക്യാമ്പസ് രാഷ്ട്രീയവും സിനിമയിലുണ്ടാകും. 1980കളിലാണ് സിനിമ നടക്കുന്നത്. മാര്‍ച്ച് 22നണ് സിനിമ റിലീസ് ചെയ്യുക.