മമ്മൂട്ടികമ്പനിയുടെ ഏഴാമത് നിര്‍മാണ ചിത്രത്തില്‍ ജോയിന്‍ ചെയ്ത് മമ്മൂട്ടി. താരം തന്നെയാണ് വിവരം അറിയിച്ചത്. നാഗര്‍കോവിലിലെ ഷൂട്ടിംഗ് ലൊക്കേഷനില്‍ വിനായകനൊപ്പമുള്ള ചിത്രം മമ്മൂട്ടി പോസ്റ്റ് ചെയ്തു. ഇതിന് പിന്നാലെ ആശംസകളുമായി ആരാധകരും രംഗത്തെത്തി. നേരത്തെ ചിത്രത്തിലെ മമ്മൂട്ടിയുടെ ലുക്ക് പുറത്തായിരുന്നു.
സെപ്റ്റംബര്‍ 25നാണ് പുതിയ സിനിമ മമ്മൂട്ടികമ്പനി ഔദ്യോഗികമായി പ്രഖ്യാപിച്ചത്. ദുല്‍ഖര്‍ സല്‍മാന്‍ ചിത്രമായ കുറിപ്പിന്റെ സഹരചയിതാവായിരുന്ന ജിതിന്‍ കെ ജോസാണ് സിനിമ സംവിധാനം ചെയ്യുന്നത്. റോഷാക്ക്,നന്‍പകല്‍ നേരത്ത് മയക്കം, കണ്ണൂര്‍ സ്‌ക്വാഡ്,കാതല്‍,ടര്‍ബോ എന്നീ സിനിമകളാണ് മമ്മൂട്ടി കമ്പനിയുടേതായി റിലീസ് ചെയ്ത സിനിമകള്‍. ഗൗതം മേനോന്‍ സിനിമയും മമ്മൂട്ടി കമ്പനിയാണ് നിര്‍മിക്കുന്നത്.ഡൊമിനിക് ആന്‍ഡ് ദി ലേഡീസ് പഴ്‌സ് എന്നാണ് സിനിമയുടെ പേര്. ഒരു ഡിറ്റക്റ്റീവ് കോമഡി ചിത്രമാകും ഇതെന്നാണ് സൂചന.
നിലവില്‍ ബസൂക്കയാണ് റിലീസിനായി ഒരുങ്ങുന്ന മമ്മൂട്ടി ചിത്രം. ഡിനോ ഡെന്നീസ് സംവിധാനം ചെയ്യുന്ന സിനിമ ഉടന്‍ തിയേറ്ററുകളിലെത്തുമെന്നാണ് വിവരം. അതേസമയം ജിതിന്‍ കെ ജോസ് സംവിധാനം ചെയ്യുന്ന ചിത്രത്തില്‍ മമ്മൂട്ടി ഒരു സൈക്കോകില്ലര്‍ കഥാപാത്രത്തെയാകും അവതരിപ്പിക്കുക എന്ന് റിപ്പോര്‍ട്ടുകളുണ്ട്. സിനിമയില്‍ വിനായകനാകും നായകവേഷത്തിലെത്തുക.
