രഞ്ജിത്തിനെതിരെ നിരവധി പരാതികള്‍ ലഭിച്ചിട്ടുണ്ടെന്ന് മന്ത്രി സജി ചെറിയാന്‍. ആരെയും വ്യക്തിപരമായി അവഹേളിക്കുന്നതിനോട് യോജിക്കാന്‍ കഴിയില്ലെന്നും താന്‍ ആരെയും വ്യക്തിപരമായി പരിഹസിക്കാറില്ലെന്നും അദ്ദേഹം കൂട്ടിച്ചേര്‍ത്തു. 23ന് ശേഷം ഇക്കാര്യത്തില്‍ നടപടി ഉണ്ടാകുമെന്ന് സജി ചെറിയാന്‍ പറഞ്ഞു. നവ കേരള സദസ്സിന് ആലപ്പുഴയില്‍ എത്തിയപ്പോഴായിരുന്നു മന്ത്രിയുടെ പ്രതികരണം.
രഞ്ജിത്തിനെ കേള്‍ക്കുന്നതിനോടൊപ്പം പരാതിക്കാരെ വിളിച്ചുവരുത്തി അവര്‍ക്ക് പറയാനുള്ളതും കേള്‍ക്കും ഏത് സാഹചര്യത്തിലാണ് മോശം പരാമര്‍ശം നടത്തിയത് എന്ന് ചോദിക്കും.വ്യക്തിപരമായ തര്‍ക്കങ്ങളാണ് എല്ലാം. അക്കാദമിയുടെ പ്രവര്‍ത്തനത്തെ ഇത് ബാധിച്ചിട്ടില്ലെന്നും മന്ത്രി കൂട്ടിച്ചേര്‍ത്തു.
വിവാദത്തില്‍ പ്രതികരണവുമായി ചലച്ചിത്ര അക്കാദമി ജനറല്‍ കൗണ്‍സില്‍ അംഗങ്ങളും രംഗത്തെത്തിയിരുന്നു. ഏകാധിപതി എന്ന രീതിയിലാണ് രഞ്ജിത്തിന്റെ പെരുമാറ്റം എന്നും ചെയര്‍മാനോട് യാതൊരു വിധേയത്വവും ഇല്ലെന്നും അംഗങ്ങള്‍ വ്യക്തമാക്കി.
