ഒരു ഭര്‍ത്താവ് എന്ന നിലയില്‍ മുകേഷ് പരാജയമായിരുന്നെന്ന് തുറന്നടിച്ച് നര്‍ത്തകി മേതില്‍ ദേവിക. മുകേഷ് നല്ല മനുഷ്യനാണ്. സ്‌നേഹിക്കാനൊക്കെ അറിയാവുന്ന മനുഷ്യന്‍. എന്നാല്‍, നല്ല ഭര്‍ത്താവ് അല്ലെന്നും ദേവിക പറഞ്ഞു. മനോരമ ന്യൂസിനോടായിരുന്നു ദേവിക ഇക്കാര്യം തുറന്നുപറഞ്ഞത്.
മുകേഷിലെ രാഷ്ട്രീയക്കാരനോട് ദേവികയ്ക്ക് വിയോജിപ്പുണ്ടായിരുന്നെന്നാണ് പ്രതികരണങ്ങളില്‍ നിന്ന് വ്യക്തമാകുന്നത്. രാഷ്ട്രീയത്തിലേക്ക് ഇറങ്ങുമ്പോള്‍ തന്നെ അതിന്റെ വരുംവരായ്കള്‍ അദ്ദേഹം തന്നെ അനുഭവിക്കണമെന്ന് പറഞ്ഞിരുന്നു. രാഷ്ട്രീയത്തിലെ വിവാദങ്ങളെല്ലാം അദ്ദേഹം തന്നെ വരുത്തിവച്ചതാണ്. അത് തിരുത്താനൊന്നും അദ്ദേഹം തയ്യാറല്ലെന്നും ദേവിക കുറ്റപ്പെടുത്തി.
കുടുംബജീവിതം നല്ല രീതിയില്‍ കൊണ്ടുപോകാന്‍ മുകേഷിന് സാധിച്ചില്ല. ജീവിതത്തില്‍ അദ്ദേഹം നല്ലൊരു ഭര്‍ത്താവായിരുന്നില്ല. എട്ടുവര്‍ഷം ഒരുമിച്ച് ജീവിച്ചിട്ടും അദ്ദേഹത്തെ എനിക്ക് മനസിലാക്കാന്‍ സാധിച്ചില്ല. ഇനി മനസിലാക്കാന്‍ സാധിക്കുമെന്നും തോന്നുന്നില്ല. അതുകൊണ്ടാണ് വിവാഹമോചനമെന്ന തീരുമാനത്തിലേക്ക് എത്തിയതെന്നും മേതില്‍ ദേവിക പ്രതികരിച്ചു. രണ്ട് പേരുടെ ആശയങ്ങള്‍ തമ്മില്‍ യോജിച്ചു പോകുന്ന സാഹചര്യമല്ലെന്ന് തോന്നിയതിനാലാണ് ഇങ്ങനെയൊരു തീരുമാനമെന്നും ദേവിക കൂട്ടിച്ചേര്‍ത്തു. മുകേഷ് ഇതിനോട് പ്രതികരിച്ചിട്ടില്ല.