ഓണം വിന്നറാകാന്‍ മോഹന്‍ലാല്‍, വിജയ്, ദുല്‍ഖര്‍, ടൊവിനോ; ഇത്തവണ മമ്മൂട്ടിയില്ല !

വിജയ് നായകനാകുന്ന 'ദ ഗോട്ട്' (ദ ഗ്രേറ്റസ്റ്റ് ഓഫ് ഓള്‍ ടൈം) സെപ്റ്റംബര്‍ അഞ്ചിന് തിയറ്ററുകളിലെത്തും

Barroz and ARM Movies

സൂപ്പര്‍താര ചിത്രങ്ങളുടെ കടുത്ത പോരാട്ടമായിരിക്കും ഇത്തവണ ഓണത്തിനു കേരള ബോക്‌സ്ഓഫീസില്‍ നടക്കുക. ഇളയദളപതി വിജയ്, മലയാളത്തിന്റെ സൂപ്പര്‍താരം മോഹന്‍ലാല്‍ എന്നിവര്‍ തുടങ്ങി ടൊവിനോ തോമസ് വരെ ഇത്തവണ ബോക്‌സ്ഓഫീസില്‍ കോടികളുടെ ബിസിനസ് ലക്ഷ്യം വെച്ച് കളത്തിലിറങ്ങും. 

വിജയ് നായകനാകുന്ന 'ദ ഗോട്ട്' (ദ ഗ്രേറ്റസ്റ്റ് ഓഫ് ഓള്‍ ടൈം) സെപ്റ്റംബര്‍ അഞ്ചിന് തിയറ്ററുകളിലെത്തും. വെങ്കട് പ്രഭുവാണ് സംവിധാനം. പ്രഭുദേവയും ചിത്രത്തില്‍ പ്രധാന വേഷം അവതരിപ്പിച്ചിരിക്കുന്നു. 

ദുല്‍ഖര്‍ സല്‍മാനെ നായകനാക്കി വെങ്കി അറ്റ്‌ലൂരി സംവിധാനം ചെയ്യുന്ന ലക്കി ഭാസ്‌കര്‍ സെപ്റ്റംബര്‍ ഏഴിനാണ് റിലീസ് ചെയ്യുക. തെലുങ്ക് ഭാഷയിലാണ് ചിത്രം പ്രധാനമായും ഒരുക്കിയിരിക്കുന്നത്. ദുല്‍ഖറിന്റെ വേഫറര്‍ ഫിലിംസാണ് ലക്കി ഭാസ്‌കര്‍ കേരളത്തിലെത്തിക്കുന്നത്. 

ടൊവിനോ തോമസിന്റെ ബിഗ് ബജറ്റ് ചിത്രം അജയന്റെ രണ്ടാം മോഷണം (A.R.M) സെപ്റ്റംബര്‍ 12 നു തിയറ്ററുകളിലെത്തും. ജിതിന്‍ ലാല്‍ സംവിധാനം ചെയ്യുന്ന ചിത്രം നിര്‍മിച്ചിരിക്കുന്ന ലിസ്റ്റിന്‍ സ്റ്റീഫനും സക്കറിയ തോമസും ചേര്‍ന്നാണ്. ആന്റണി വര്‍ഗീസിനെ (പെപ്പെ) നായകനാക്കി അജിത് മാമ്പള്ളി സംവിധാനം ചെയ്ത ആക്ഷന്‍ ചിത്രം കൊണ്ടല്‍ സെപ്റ്റംബര്‍ 12 നു തന്നെയാണ് റിലീസ് തീരുമാനിച്ചിരിക്കുന്നത്. 

മോഹന്‍ലാല്‍ ആദ്യമായി സംവിധാനം ചെയ്ത 'ബറോസ്' സെപ്റ്റംബര്‍ 13 നാണ് റിലീസ് ചെയ്യുക. ഫാന്റസി ത്രില്ലറായ ചിത്രം 3D ഫോര്‍മാറ്റിലാകും പ്രേക്ഷകരിലേക്ക് എത്തുക. മോഹന്‍ലാല്‍ തന്നെയാണ് കേന്ദ്ര കഥാപാത്രത്തെ അവതരിപ്പിച്ചിരിക്കുന്നത്.