ലാൽ ജോസും പൃഥ്വിരാജും വീണ്ടും ഒന്നിക്കുന്നു, സിനിമയുടെ പ്രഖ്യാപനം നാൽപ്പത്തിയൊന്നിന്റെ വിജയാഘോഷത്തിനിടെ

അയാളും ഞാനും തമ്മിൽ എന്ന സിനിമക്ക് ശേഷം പൃഥ്വിരാജും ലാൽജോസും വീണ്ടും ഒന്നിക്കുന്നു എന്ന വാർത്തയാണ് ഇപ്പോൾ മലയാള സിനിമാ ലോകത്ത് സജീവമായി ചർച്ച ചെയ്യപ്പെടുന്നത്. ബിജു മേനോനും പൃഥ്വിരാജും പ്രധാന വേഷങ്ങളിൽ എത്തുന്ന അയ്യപ്പനും കോശിയും എന്ന ചിത്രത്തിന്റെ ലൊക്കേഷനിൽ വെച്ചായിരുന്നു. പുതിയ സിനിമയുടെ പ്രഖ്യാപനം.

ലാൽ ജോസ് സംവിധാനം ചെയ്ത നാൽപ്പത്തിയൊന്ന് എന്ന സിനിമ ഇപ്പോൾ തീയറ്ററുകളിൽ മികച്ച പ്രതികരണവുമായി മുന്നേറുകയാണ്. ചിത്രത്തിന്റെ വിജയം ആഘോഷിക്കുന്നതിനായി ലാൽ‌ ജോസും സംഘവും അയ്യപ്പനും കോശിയും എന്ന സിനിമയുടെ സെറ്റിൽ എത്തുകയായിരുന്നു. പൃഥ്വിരാജ് ഫെയ്സ്ബുക്കിൽ ലൈവെത്തിയാണ് പുതിയ സിനിമയെ കുറിച്ച് ആരാധകരെ അറിയിച്ചത്.

നാൽപ്പത്തിയൊന്നിന്റെ തിരക്കഥാകൃത്തായ പി ജി പ്രഗീഷ് തന്നെയാണ് പുതിയ സിനിമക്കും തിരക്കഥ ഒരുക്കുന്നത്. ഏഴ് വർഷങ്ങൾക്ക് ശേഷമാണ് ലാൽജോസും പൃഥ്വിരാജും വീണ്ടും ഒന്നിക്കുന്നത്. അയാളും ഞാനും തമ്മിൽ എന്ന സിനിമയിൽ ഡോക്ടർ രവി തരകൻ. പൃഥ്വിരാജിന്റെ മികച്ച കഥാപാത്രങ്ങളിൽ ഒന്നായിരുന്നു. ബോബി സഞ്ജെയ് ആണ് സിനിമക്ക് തിരക്കഥ ഒരുക്കിയത്.