ജിമ്മിനൊപ്പം ആയോധന കല, കര്‍ക്കശമായ ഡയറ്റ്, ഇഷ്ടമുള്ള ഭക്ഷണം പോലും കുറച്ചേ കഴിക്കൂ; പുനീത് രാജ്കുമാറിന് ഹൃദയാഘാതം സംഭവിച്ചത് വിശ്വസിക്കാനാകാതെ ആരാധകര്‍

ബോഡി ഫിറ്റ്‌നെസിന് ഇത്രയേറെ പ്രാധാന്യം നല്‍കുന്ന പുനീത് രാജ്കുമാര്‍ ഹൃദയാഘാതത്തെ തുടര്‍ന്ന് മരിച്ചത് വിശ്വസിക്കാതെ ആരാധകര്‍. ജിമ്മിലെ വ്യായാമത്തിനൊപ്പം ആയോധന കലയും പുനീതിന് അറിയാം. ആയോധന കല അഭ്യസിക്കേണ്ടതിന്റെ ആവശ്യകതയെ കുറിച്ച് സോഷ്യല്‍ മീഡിയയില്‍ പുനീത് നിരന്തരം സംസാരിക്കാറുണ്ട്. ഭക്ഷണത്തിന്റെ കാര്യത്തിലും കര്‍ശന ഡയറ്റാണ് പുനീത് പാലിക്കുന്നത്. എത്ര ഇഷ്ടമുള്ള ഭക്ഷണമായാലും മിതമായ അളവില്‍ മാത്രമേ പുനീത് രാജ്കുമാര്‍ കഴിക്കൂ. 

ഹൃദയാഘാതത്തെ തുടര്‍ന്നാണ് കന്നഡ സൂപ്പര്‍സ്റ്റാര്‍ പുനീത് രാജ്കുമാറിനെ ഇന്ന് രാവിലെ ആശുപത്രിയില്‍ പ്രവേശിപ്പിച്ചത്. ജിമ്മില്‍ വ്യായാമം ചെയ്യുന്നതിനിടെ താരത്തിനു ഹൃദയാഘാതം സംഭവിക്കുകയായിരുന്നു. ഉടന്‍ തന്നെ ബെംഗളൂരുവിലെ ആശുപത്രിയില്‍ എത്തിച്ചു. ഐസിയുവില്‍ പ്രവേശിപ്പിച്ചെങ്കിലും ആരോഗ്യനിലയില്‍ പുരോഗതി ഉണ്ടായില്ല. ഓരോ മിനിറ്റുകള്‍ കഴിയുംതോറും ആരോഗ്യനില കൂടുതല്‍ മോശമാകുകയായിരുന്നു. ഒടുവില്‍ വെള്ളിയാഴ്ച ഉച്ചയോടെ പുനീത് രാജ്കുമാറിന്റെ മരണം സ്ഥിരീകരിച്ചു. 

ഇന്നലെ രാത്രി മുഴുവന്‍ പുനീതിന് നെഞ്ചില്‍ അസ്വസ്ഥതകള്‍ ഉണ്ടായിരുന്നു. എന്നാല്‍, രാവിലെ കുഴപ്പം ഒന്നും ഇല്ല എന്ന് പറഞ്ഞ് നടന്‍ ജിമ്മിലേക്ക് പോകുകയായിരുന്നു. ജിമ്മില്‍ വച്ച് വീണ്ടും ആരോഗ്യ അസ്വസ്ഥതകള്‍ നേരിട്ടതിനെ തുടര്‍ന്ന് ആശുപത്രിയില്‍ എത്തിക്കുകയായിരുന്നുവെന്ന് കന്നഡ മാധ്യമങ്ങള്‍ റിപ്പോര്‍ട്ട് ചെയ്യുന്നു. രാത്രി നെഞ്ചില്‍ അസ്വസ്ഥതകള്‍ തോന്നിയത് സൈലന്റ് അറ്റാക്കിന്റെ തുടക്കമായിരിക്കാം എന്നാണ് ആരോഗ്യവിദഗ്ധരുടെ അഭിപ്രായം. രാത്രി ആരോഗ്യപരമായ അസ്വസ്ഥതകള്‍ തോന്നിയെങ്കിലും പുനീത് അത് കാര്യമായി എടുത്തില്ല. 

കന്നഡ സിനിമയില്‍ ഏറ്റവും അധികം പ്രതിഫലം വാങ്ങുന്ന നടനാണ് പുനീത്. ഇക്കഴിഞ്ഞ ഏപ്രിലില്‍ പുറത്തിറങ്ങിയ യുവരത്നയാണ് അദ്ദേഹം ഒടുവിലായി ചെയ്തത്. പ്രശസ്ത കന്നട നടന്‍ ഡോ.രാജ്കുമാറിന്റെ മകനാണ് പുനീത് രാജ് കുമാര്‍.