പഞ്ചവര്‍ണത്തത്ത എന്ന സൂപ്പര്‍ഹിറ്റ് സിനിമയ്ക്ക് ശേഷം രമേഷ് പിഷാരടി സംവിധാനം ചെയ്യുന്ന ചിത്രത്തില്‍ മമ്മൂട്ടി നായകനാകുന്നു. ‘ഹിറ്റ്‌ലര്‍’ പോലെ ഒരു തകര്‍പ്പന്‍ കോമഡിച്ചിത്രത്തിനാണ് പിഷാരടി ശ്രമിക്കുന്നത്. മമ്മൂട്ടി ഡേറ്റ് നല്‍കിക്കഴിഞ്ഞതായാണ് വിവരം.
ആന്‍റോ ജോസഫ് ഫിലിം കമ്പനിയുടെ ബാനറില്‍ ആന്‍റോ ജോസഫാണ് ചിത്രം നിര്‍മ്മിക്കുന്നത്. ബിഗ് ബജറ്റില്‍ ഒരുങ്ങുന്ന സിനിമയില്‍ മലയാളത്തിലെ നൂറോളം താരങ്ങളും അണിനിരക്കും. രമേഷ് പിഷാരടി തന്നെയായിരിക്കും ചിത്രത്തിന് തിരക്കഥ രചിക്കുക.
മമ്മൂട്ടിയുടെ കരിയര്‍ പരിശോധിച്ചാല്‍ സിദ്ദിക്ക് സംവിധാനം ചെയ്ത ഹിറ്റ്‌ലര്‍ എന്ന സിനിമയ്ക്ക് ഒരു സവിശേഷ സ്ഥാനമുണ്ടെന്ന് മനസിലാകും. ആ സിനിമ ഒരു ഇന്‍ഡസ്ട്രി ഹിറ്റായിരുന്നു. അതിന് കാരണം അത് എല്ലാം തികഞ്ഞ ഒരു എന്‍റര്‍ടെയ്നര്‍ ആയിരുന്നു എന്നതാണ്. അതുപോലെയൊരു വമ്പന്‍ ഹിറ്റ് ഒരുക്കുന്നാനുള്ള ശ്രമത്തിലാണ് രമേഷ് പിഷാരടി.
മമ്മൂട്ടിയാകട്ടെ ഇപ്പോള്‍ തെലുങ്ക് ചിത്രമായ ‘യാത്ര’യുടെ തിരക്കിലാണ്. അതിന് ശേഷം ‘മാമാങ്ക’ത്തില്‍ ജോലി ചെയ്യുന്ന മമ്മൂട്ടി വൈശാഖ് സംവിധാനം ചെയ്യുന്ന രാജ 2ലും അഭിനയിക്കുന്നുണ്ട്. അതിനിടയിലാണ് രമേഷ് പിഷാരടിക്ക് മെഗാസ്റ്റാര്‍ ഡേറ്റ് നല്‍കിയിരിക്കുന്നത്.
