ഒരേ ദിവസം രണ്ട് പരാശക്തിയോ? തമിഴ് സിനിമയിൽ പുതിയ പോര്, വിവാദം

Parasakti

സിനിമാ ടൈറ്റിലിന്റെ പേരില്‍ തമിഴകത്ത് തര്‍ക്കം പുകയുന്നു. ബുധനാഴ്ചയാണ് ശിവകാര്‍ത്തികേയന്റെ പുതിയ സിനിമയുടെ ടീസറും ടൈറ്റിലും അണിയറപ്രവര്‍ത്തകര്‍ പുറത്തുവിട്ടത്. നേരത്തെ പുറനാനൂറ് എന്ന പേരില്‍ ചെയ്യാനിരുന്ന സിനിമയ്ക്ക് പരാശക്തിയെന്ന പുതിയ പേരാണ് സുധ കൊങ്ങര ഇട്ടിരിക്കുന്നത്. സൂര്യ, ദുല്‍ഖര്‍ സല്‍മാന്‍, നസ്‌റിയ എന്നിവര്‍ ചെയ്യാനിരുന്ന സിനിമയില്‍ ഇവര്‍ക്ക് പകരമെത്തുന്നത് ശിവകാര്‍ത്തികേയന്‍, രവി മോഹന്‍, ശ്രീലീല എന്നിവരാണ്.

സിനിമയുടെ ടീസര്‍ പ്രേക്ഷകൃ ഏടെടുത്തതിന് പിന്നാലെയാണ് നടനും നിര്‍മാതാവും സംവിധായകനുമായ വിജയ് ആന്റണി തന്റെ പുതിയ സിനിമയുടെ പേരും പുറത്തുവിട്ടത്. ഈ സിനിമയുടെ പേരും പരാശക്തി എന്ന് തന്നെയാണ്. ഇതിനൊപ്പം സൗത്ത് ഇന്ത്യന്‍ ഫിലിം ചേംബര്‍ ഓഫ് കോമേഴ്‌സിന്റെ ഒരു കത്തും വിജയ് ആന്റണി പുറത്തുവിട്ടിരുന്നു. അവരുടെ റെക്കോര്‍ഡ് പ്രകാരം വിജയ് ആന്റണി പിക്‌ചേഴ്‌സ് 6 മാസം മുന്‍പ് തെലുങ്കില്‍ പരാശക്തി എന്ന ടൈറ്റില്‍ രജിസ്റ്റര്‍ ചെയ്തിട്ടുണ്ടെന്നാണ് പറയുന്നത്.

 എന്നാല്‍ സുധാ കൊങ്ങരയുടെ പരാശക്തിയുടെ നിര്‍മാതാക്കളായ ഡോണ്‍ പിക്‌ചേഴ്‌സ് ഇതിനെതിരെ രംഗത്ത് വന്നു. തങ്ങള്‍ക്ക് തമിഴിലും തെലുങ്കിലും പരാശക്തി എന്ന ടൈറ്റിലിന് അവകാശമുണ്ടെന്നാണ് ഡോണ്‍ പിക്‌ചേഴ്‌സ്  വ്യക്തമാക്കിയത്. ഇതിനിടെ 1952ല്‍ ഇറങ്ങിയ തമിഴ് കള്‍ട്ട് ക്ലാസിക് സിനിമയായ പരാശക്തിയുടെ നിര്‍മാതാക്കളായ എവിഎം സ്റ്റുഡിയോ സുധ കൊങ്ങര സിനിമയ്ക്ക് ആശംസ നേര്‍ന്ന് രംഗത്ത് വന്നിട്ടുണ്ട്.