വെറുപ്പിന്റെ പ്രത്യയശാസ്ത്രം വിടുന്നവര്‍ അനാഥരാവില്ല, ബിജെപിയിലെ അസംതൃപ്തരെ സ്വാഗതം ചെയ്ത് സന്ദീപ് വാര്യര്‍

Sandeep varier

ബിജെപി വിടാന്‍ ആഗ്രഹിക്കുന്നവരെ കോണ്‍ഗ്രസിലേക്ക് സ്വാഗതം ചെയ്ത് അടുത്തിടെ ബിജെപി വിട്ട് കോണ്‍ഗ്രസിലെത്തിയ സന്ദീപ് വാര്യര്‍. വെറുപ്പിന്റെ പ്രത്യയശാസ്ത്രത്തെ പൂര്‍ണ്ണമായും തള്ളിപ്പറഞ്ഞ് മതനിരപേക്ഷതയുടെ ഭാഗമാവാനും കോണ്‍ഗ്രസിന്റെ പ്രത്യയശാസ്ത്രത്തിനോട് ഐക്യപ്പെടാനും സന്നദ്ധതയുള്ള ഒരാളും രാഷ്ട്രീയമായി അനാഥമാവില്ലെന്ന് ഫേസ്ബുക്കില്‍ പങ്കുവെച്ച പോസ്റ്റില്‍ സന്ദീപ് വാര്യര്‍ പറഞ്ഞു.

പാലക്കാട് ഉപതിരെഞ്ഞെടുപ്പ് പരാജയത്തിന് പിന്നാലെ ബിജെപി നേതൃത്വത്തിനെതിരെ പ്രവര്‍ത്ത്കര്‍ക്കിടയില്‍ അസംതൃപ്തി പരസ്യമായതോടെയാണ് സന്ദീപ് വാര്യരുടെ പോസ്റ്റ്. പാലക്കാട് ഉപതിരെഞ്ഞെടുപ്പിലെ പരാജയത്തിന് പിന്നാലെ സ്ഥാനാര്‍ഥി നിര്‍ണയമടക്കമുള്ള സംസ്ഥാന നേതൃത്വത്തിന്റെ നടപടികള്‍ക്കെതിരെ പാലക്കാട്ടെ പ്രാദേശിക ബിജെപി നേതാക്കള്‍ രംഗത്ത് വന്നിരുന്നു.

 ഇതിനിടെ ബിജെപിയില്‍ നിന്നും രാജിവെച്ച മുന്‍ വയനാട് ജില്ലാ പ്രസിഡന്റ് കെ പി മധുവിനെ കോണ്‍ഗ്രസിലെത്തിക്കാന്‍ സന്ദീപ് വാര്യരുടെ മേല്‍നോട്ടത്തില്‍ ഇടപെടല്‍ നടക്കുന്നുവെന്ന് റിപ്പോര്‍ട്ടുകളുണ്ട്. ബിജെപിയിലെ ഗ്രൂപ്പ് കളിയെ വിമര്‍ശിച്ചുകൊണ്ടായിരുന്നു കെ പി മധു പാര്‍ട്ടിവിട്ടത്.