ബിജെപി വിട്ട് എങ്ങോട്ടുമില്ല, നരേന്ദ്രമോദിക്കും അമിത് ഷായ്ക്കും ഉറച്ച പിന്തുണ നൽകുമെന്ന് സുരേഷ് ഗോപി

ബിജെപി സജീവ രാഷ്ട്രീയത്തിൽ നിന്നും പിന്മാറി അഭിനയത്തിലേക്ക് ശ്രദ്ധ കേന്ദ്രീകരിക്കുമെന്ന അഭ്യൂഹങ്ങളെ തള്ളി സുരേഷ് ഗോപി. വാർത്തകൾക്ക് പിന്നിൽ ദുഷ്ടലാക്കുണ്ടെന്നും നരേന്ദ്രമോദിക്കും അമിത് ഷായ്ക്കും ജെപി നദ്ദയ്ക്കും രാജ്നാഥ് സിങ്ങിനും ഉറച്ച പിന്തുണ തുടരുമെന്നും സുരേഷ് ഗോപി വ്യക്തമാക്കി.

വീണ്ടും രാജ്യസഭാ സീറ്റ് നൽകാത്തതിനെ തുടർന്ന് സുരേഷ് ഗോപി പാർട്ടി വിടുമെന്നായിരുന്നു നേരത്തെ പുറത്തുവന്ന വാർത്തകൾ. ഈ അഭ്യൂഹങ്ങളാണ് സുരേഷ് ഗോപി തള്ളികളഞ്ഞത്. ആ വാർത്തകൾ സൃഷ്ടിച്ചവരോട് തന്നെ അതെന്തിനായിരുന്നുവെന്ന് ചോദിക്കണമെന്നാണ് സുരേഷ് ഗോപി പറഞ്ഞത്.

അതേസമയം സുരേഷ് ഗോപിയെ തൃശൂർ ലോക്സഭാ മണ്ഡലത്തിൽ മത്സരിപ്പിക്കാനാണ് സംസ്ഥാന ബിജെപി ആഗ്രഹിക്കുന്നത്. ഇക്കാര്യത്തിൽ സുരേഷ് ഗോപി തൻ്റെ നിലപാട് വ്യക്തമാക്കിയിട്ടില്ല. തൃശൂരിനേക്കാൾ തിരുവനന്തപുരതായിരിക്കും വിജയസാധ്യത കൂടുതലെന്ന അഭിപ്രായങ്ങൾ സുരേഷ് ഗോപിക്ക് ലഭിച്ചിട്ടുണ്ട്.