പ്രശസ്ത ഗായകനും സംഗീത സംവിധായകനുമായ കെ ജി ജയന് അദാരാഞ്ജലികള്‍ അര്‍പ്പിച്ച് മലയാള സിനിമ ലോകം. അദ്ദേഹത്തിന്റെ പാട്ടുകളിലൂടെ മലയാളികള്‍ ഓര്‍ക്കുമെന്ന് അനുശോചനം അറിയിച്ചുകൊണ്ട് സിനിമാരംഗത്തുള്ളവര്‍ കുറിച്ചു.
'ശാസ്ത്രീയ സംഗീത രംഗത്ത് തന്റേതായ വ്യക്തിമുദ്ര പതിപ്പിക്കുകയും ഭക്തിഗാന ശാഖയില്‍ വേറിട്ട സംഭാവനകള്‍ നല്‍കുകയും ചെയ്ത മഹാനായ സംഗീതഞ്ജനായിരുന്നു ശ്രീ കെ ജി ജയന്. ഗാനങ്ങളിലെ ഭക്തിയും നൈര്‍മ്മല്യവും, ജീവിതത്തിലും സാംശീകരിച്ച്, സഹോദരസ്‌നേഹത്തില്‍ നമുക്ക് ഏവര്‍ക്കും മാതൃകയായി മാറിയ ആ മഹാകലാകാരന് ആദരാഞ്ജലികള്‍',- എന്നാണ് അനുശോചനം അറിയിച്ച് മോഹന്‍ലാല്‍ സോഷ്യല്‍ മീഡിയയില്‍ കുറിച്ചത്.
'പ്രിയ സുഹൃത്തും സഹപ്രവര്‍ത്തകനും സഹോദരനുമായ ശ്രീ മനോജ് കെ ജയന്റെ പിതാവും സംഗീതജ്ഞനുമായ കെ ജി ജയന് അന്തരിച്ചു. കുടുംബത്തിന്റെ ദുഃഖത്തിനൊപ്പം പങ്കുചേരുന്നു. ആദരാഞ്ജലികള്‍', എന്നാണ് ദിലീപ് കുറിച്ചത്.
'നക്ഷത്രദീപങ്ങള്‍....പൊലിഞ്ഞു. മലയാളത്തിന്റെ പാരമ്പര്യമറിഞ്ഞുകൊണ്ട് എത്രയെത്ര പാട്ടുകള്‍. ഭക്തിയുടെ സ്‌നേഹത്തിന്റെ കാരുണ്യത്തിന്റെ നിറകുടം. പ്രിയ സുഹൃത്ത് മനോജിന്റെയും കുടുംബത്തിന്റെയും ഒപ്പം..ആദരാഞ്ജലികള്‍', -എന്ന് മധുപാലും സോഷ്യല്‍ മീഡിയയില്‍ എഴുതി.