പുകവലിക്ക് അടിമയായ യുവാവിന്റെ കഥ പറഞ്ഞ സിനിമയാണ് തീവണ്ടി. ടൊവിനോ തോമസും സംയുക്ത മേനോനും കേന്ദ്ര കഥാപാത്രങ്ങളെ അവതരിപ്പിച്ച തീവണ്ടി തിയറ്ററുകളില്‍ ശ്രദ്ധിക്കപ്പെട്ടു. നവാഗതനായ ഫെല്ലിനിയാണ് 2018 ല്‍ തീവണ്ടി സംവിധാനം ചെയ്തത്. സിനിമയില്‍ ടൊവിനോയുടെ അഭിനയം ഏറെ ശ്രദ്ധിക്കപ്പെട്ടിരുന്നു.
യഥാര്‍ഥത്തില്‍ തീവണ്ടി സിനിമയില്‍ ടൊവിനോ ചെയ്ത കഥാപാത്രം കുഞ്ചാക്കോ ബോബനാണ് ചെയ്യേണ്ടിയിരുന്നത്. സിനിമയുടെ കഥ കേട്ട ചാക്കോച്ചന്‍ 'നോ' പറയുകയായിരുന്നു. സിഗരറ്റ് വലിക്കുന്ന കഥാപാത്രമായി അഭിനയിക്കാന്‍ താല്‍പര്യമില്ലാത്തതുകൊണ്ടാണ് കുഞ്ചാക്കോ ബോബന്‍ തീവണ്ടിയിലെ കഥാപാത്രത്തോട് 'നോ' പറഞ്ഞത്. ആ കഥാപാത്രം ചെയ്തു ഫലിപ്പിക്കാന്‍ തനിക്കു കഴിയില്ല എന്ന് തോന്നിയെന്നും ചാക്കോച്ചന്‍ പറയുന്നു. ദ് ക്യുവിന് നല്‍കിയ അഭിമുഖത്തില്‍ സംസാരിക്കുകയായിരുന്നു അദ്ദേഹം. ജീവിതത്തില്‍ സിഗരറ്റ് വലിക്കാത്ത താന്‍, ചെയിന്‍ സ്മോക്കര്‍ ആയി അഭിനയിച്ചാല്‍ ആരോഗ്യ പ്രശ്നം വരെ ഉണ്ടാവുമെന്നും ഷൂട്ടിംഗ് പോലും വിചാരിച്ച സമയത്തു തീരില്ല എന്നും ചാക്കോച്ചന്‍ തീവണ്ടിയുടെ സംവിധായകനോട് പറഞ്ഞു. പിന്നീടാണ് തനിക്ക് പകരം വേറെ ആളെ തേടി അവര്‍ പോയതെന്നും ചാക്കോച്ചന്‍ കൂട്ടിച്ചേര്‍ത്തു.
