കെജിഎഫ് 2 വിന് ശേഷം അടുത്ത യാഷ് ചിത്രം, പ്രഖ്യാപനം ഉടൻ

കെജിഎഫ് എന്ന ഒറ്റ ചിത്രത്തിലൂടെ ഇന്ത്യയെങ്ങും ആരാധകരെ സ്വന്തമാക്കിയ താരമാണ് യാഷ്. കന്നഡ സിനിമയുടെ തന്നെ തലവര മാറ്റിയ ചിത്രമായിരുന്നു കെജിഎഫ്. ഇതിന് ശേഷം കാന്താര ഉൾപ്പടെ നിരവധി ചിത്രങ്ങൾ ഇന്ത്യയെങ്ങും വലിയ വിജയങ്ങൾ സൃഷ്ടിച്ചു. ഇപ്പോഴിതാ കെജിഎഫ് 2വിന് ശേഷം യാഷ് നായകനാകുന്ന പുതിയ ചിത്രത്തെ പറ്റിയുള്ള വാർത്തകളാണ് പുറത്തുവരുന്നത്.

ഏപ്രിൽ മാസത്തിൽ ചിത്രത്തിൻ്റെ പ്രഖ്യാപനമുണ്ടാകുമെന്നാണ് വിവരം. കഴിഞ്ഞ കുറച്ചേറെ നാളുകളായി യാഷ് നിരവധി കഥകളാണ് കേൾക്കുന്നത്. എന്നാൽ കെജിഎഫ് 2വിന് ശേഷം ഇറങ്ങുന്ന ചിത്രം പ്രേക്ഷകരുടെ പ്രതീക്ഷയ്ക്കൊത്ത സിനിമയാകണമെന്ന് യാഷിന് നിർബന്ധമുണ്ട്. അടുത്ത ചിത്രം കെജിഎഫ് 3 ആയിരിക്കുമോ എന്നതിലും സംശയമുണ്ട്.

നേരത്തെ കെജിഎഫിന് മൂന്നാം ഭാഗമുണ്ടാകുമെന്ന് ചിത്രത്തിൻ്റെ നിർമാതാക്കളായ ഹൊംബാളെ ഫിലിംസ് അറിയിച്ചിരുന്നു. എന്നാൽ ഈ ചിത്രം അടുത്തുണ്ടാകില്ലെന്നാണ് നിർമാതാക്കൾ വ്യക്തമാക്കിയത്. അതിനാൽ തന്നെ കെജിഎഫ് 3 2025ലെ പ്രതീക്ഷിക്കേണ്ടതായുള്ളു. നിലവിൽ സലാർ എന്ന പുതിയ ചിത്രത്തിൻ്റെ തിരക്കിലാണ് കെജിഎഫ് സംവിധായകനായ പ്രശാന്ത് നീൽ.