ഒന്ന് വീഴാന്‍ കാത്തിരിക്കുകയായിരുന്നു ?, 2 ഡക്കുകള്‍ക്ക് പിന്നാലെ സഞ്ജുവിന്റെ അച്ഛന്റെ പ്രതികരണം നോര്‍ത്ത് ഇന്ത്യയിലും വൈറല്‍

Sanju samson

ഇന്ത്യന്‍ ടി20 ടീമില്‍ തുടര്‍ച്ചയായ 2 സെഞ്ചുറി പ്രകടനങ്ങള്‍ കൊണ്ട് ഓപ്പണര്‍ റോളില്‍ സഞ്ജു സാംസണ്‍ തിളങ്ങിയതോടെ സഞ്ജുവിന്റെ മോശം ദിവസങ്ങള്‍ അവസാനിച്ചെന്ന് കരുതിയവരായിരുന്നു സഞ്ജു ആരാധകരെല്ലാം തന്നെ. എന്നാല്‍ തുടര്‍ച്ചയായ സെഞ്ചുറി പ്രകടനങ്ങള്‍ക്ക് പിന്നാലെ വന്നത് തുടര്‍ച്ചയായ 2 പൂജ്യങ്ങളായിരുന്നു. ഇതോടെ സഞ്ജുവിന്റെ സ്ഥിരതയ്ക്ക് മുകളിലുള്ള ചോദ്യങ്ങള്‍ വീണ്ടും സജീവമായിരിക്കുകയാണ്.

 നേരത്തെ സഞ്ജു തുടര്‍ച്ചയായ 2 സെഞ്ചുറികള്‍ നേടിയപ്പോള്‍ സഞ്ജുവിന്റെ പിതാവ് നടത്തിയ പരാമര്‍ശങ്ങള്‍ ഇപ്പോള്‍ നോര്‍ത്ത് ഇന്ത്യയിലെങ്ങും വാര്‍ത്തയാണ്. 2 സെഞ്ചുറികള്‍ തുടര്‍ച്ചയായി സ്വന്തമാക്കിയതോടെ ഒരു മലയാളം മാധ്യമത്തിന് നല്‍കിയ അഭിമുഖത്തില്‍ മഹേന്ദ്ര സിംഗ് ധോനി, രോഹിത് ശര്‍മ, വിരാട് കോലി,രാഹുല്‍ ദ്രാവിഡ് എന്നിവര്‍ ചേര്‍ന്ന് സഞ്ജുവിന്റെ 10 വര്‍ഷത്തെ കരിയര്‍ നശിപ്പിച്ചെന്ന് സഞ്ജു സാംസണിന്റെ പിതാവ് വികാരാധീനനായി പറഞ്ഞിരുന്നു.