ടെസ്റ്റിൽ കോലിക്ക് തലവേദന സൃഷ്ടിച്ച ബൗളർമാർ ഇവർ, ഏറ്റവും കൂടുതൽ തവണ കീഴടങ്ങിയത് ആൻഡേഴ്‌സണ് മുന്നിൽ

ഇംഗ്ലണ്ടിനെതിരായ ടെസ്റ്റ് പരമ്പരയിൽ തന്റെ മോശം ഫോമിൽ നിന്നുള്ള മടക്കമായിരിക്കും ഇന്ത്യൻ നായകൻ സ്വപ്‌നം കണ്ടിരിക്കുക. എന്നാൽ മൂന്നാം ടെസ്റ്റിലെ ആദ്യ ഇന്നിങ്സ് അവസാനിക്കുമ്പോൾ ഇതുവരെയും മികച്ച പ്രകടനം കാഴ്‌ച്ചവെയ്ക്കാൻ കോലിക്കായിട്ടില്ല. തന്റെ കരിയറിലെ ഏറ്റവും മോശം കാലഘട്ടത്തിലൂടെ കോലി പോകുമ്പോൾ കോലിയെ ഏറ്റവും കൂടുതൽ പുറത്താക്കിയ ബൗളർമാർ ആരെല്ലാമെന്ന് നോക്കാം.

ഏഴ് തവണ വീതം കോലിയെ പുറത്താക്കിയിട്ടുള്ള ഓസ്ട്രേലിയൻ സ്പിന്നർ നതാൻ ലിയോണും ഇംഗ്ലണ്ടിന്റെ സ്റ്റാർ പേസർ ജെയിംസ് ആൻഡേഴ്‌സണുമാണ് പട്ടികയിൽ ഒന്നാമതുള്ളത്. 33 ടെസ്റ്റ് ഇന്നിങ്സുകളിൽ നിന്നാണ് ലിയോൺ കോലിയെ 7 തവണ പുറത്താക്കിയത്. അതേസമയം 41 ടെസ്റ്റുകളിൽ നിന്നാണ് ആൻഡേഴ്‌സണിന്റെ നേട്ടം.

അഞ്ച് തവണ കോലിയെ പുറത്താക്കിയ പാറ്റ് കമ്മിൻസാണ് ലിസ്റ്റിൽ രണ്ടാമത്. 10 ടെസ്റ്റ് ഇന്നിങ്സുകളിൽ നിന്നാണ് കമ്മിൻസിന്റെ നേട്ടം. 2017ലെ ബോര്‍ഡര്‍ ഗവാസ്‌കര്‍ ട്രോഫിയിൽ 3 തവണയാണ് കോലിയെ താരം പുറത്താക്കിയത്. അതേസമയം ഇംഗ്ലണ്ടിന്റെ മോയിൻ അലി, ബെൻ സ്റ്റോക്‌സ് എന്നിവരും കോലിയെ അഞ്ച് തവണ പുറത്താക്കിയ ബൗളർമാരാണ്.

സ്പിന്നറായ മോയിന്‍ അലി 24 ഇന്നിങ്‌സില്‍ നിന്നാണ് കോലിയെ അഞ്ച് തവണ പുറത്താക്കിയത്. ബെന്‍ സ്‌റ്റോക്‌സ് 25 ഇന്നിങ്‌സില്‍ നിന്നാണ് കോലിയെ അഞ്ച് തവണ പുറത്താക്കിയത്.