ഐപിഎൽ പതിനഞ്ചാം സീസണിൽ ആദ്യമായി ബയോബബിളിൽ കൊവിഡ് സ്ഥിരീകരിച്ചു. ഡൽഹി ക്യാപ്പിറ്റൽസ് ടീം ഫിസിയോ പാട്രിക് ഫർഹാർടിനാണ് കൊവിഡ് സ്ഥിരീകരിച്ചത്. ഇതോടെ ഡൽഹി ടീം നിരീക്ഷണത്തിലായി. പാട്രിക് ഫർഹാർടിനെ ഡൽഹി ക്യാപ്പിറ്റൽസ് ടീം നിരീക്ഷിച്ചുവരികയാണെന്ന് ഐപിഎൽ വൃത്തങ്ങൾ അറിയിച്ചു.
അതേസമയം ഡൽഹി ക്യാപ്പിറ്റൽസ് താരങ്ങൾക്കാർക്കും തന്നെ കൊവിഡ് കണ്ടെത്തിയിട്ടില്ല. ശനിയാഴ്‌ച നടക്കേണ്ട റോയല്‍ ചലഞ്ചേഴ്‌സ് ബാംഗ്ലൂരിനെതിരായ മത്സരത്തിനായി തയ്യാറെടുക്കുകയാണ് ടീം അംഗങ്ങള്‍. മുംബൈയിലെ ബ്രബോണ്‍ സ്റ്റേഡിയത്തില്‍ കൊല്‍ക്കത്ത നൈറ്റ് റൈഡേഴ്‌സിനെതിരെയായിരുന്നു ഡല്‍ഹിയുടെ അവസാന മത്സരം.
2019 ഓഗസ്റ്റ് മുതല്‍ ഡല്‍ഹി ക്യാപിറ്റല്‍സിന്റെ ഭാഗമാണ് പാട്രിക് ഫർഹാർട്. 2015 മുതല്‍ ഇന്ത്യന്‍ പുരുഷ ക്രിക്കറ്റ് ടീമിനൊപ്പം പ്രവര്‍ത്തിച്ച പരിചയവും അദേഹത്തിനുണ്ട്. 2019 ലോകകപ്പിന് ശേഷമായിരുന്നു ഇന്ത്യൻ ടീമിൽ നിന്നും ഫർഹാർട് വിടപറഞ്ഞത്. ഐപിഎല്ലിൽ മുംബൈ ഇന്ത്യൻസ്,പഞ്ചാബ് കിംഗ്‌സ് ടീമുകൾക്കൊപ്പവും പാട്രിക് പ്രവർത്തിച്ചിട്ടുണ്ട്.
