ആ ഇന്ത്യൻ താരത്തിന്റെ കരിയർ അവസാനിച്ചുവെന്ന് കരുതിയതാണ്, പക്ഷേ തിരിച്ചുവരവ് അത്ഭുതപ്പെടുത്തി- മഗ്രാത്ത്

അഭിറാം മനോഹർ

വ്യാഴം, 27 ഫെബ്രുവരി 2020 (12:11 IST)
ന്യൂസിലൻഡിനെതിരായ മത്സരത്തിലെ ഇന്ത്യൻ പേസ് ബൗളിംഗ് നിരയെ അഭിനന്ദിച്ച് മുൻ ഓസീസ് ബൗളറും ഇതിഹാസ താരവുമായ ഗ്ലെൻ മഗ്രാത്ത്. മത്സരത്തിൽ ഇന്ത്യയുടെ പേസ് ബൗളിംഗ് താരമായ ഇഷാന്ത് ശർമ്മയുടെ പ്രകടനം തന്നെ അത്ഭുതപ്പെടുത്തിയെന്നും താരം പറഞ്ഞു. വളരെയധികം പരിചയ സമ്പത്തുള്ള കളിക്കാരനാണ് ഇഷാന്ത്.കുറച്ചുനാളത്തെ ഇടവേളയ്ക്ക് ശേഷം അദ്ദേഹം നടത്തിയ തിരിച്ചുവരവ് ഗംഭീരമാണ്. ഇഷാന്തിന്റെ കരിയര്‍ കുറച്ച് വര്‍ഷങ്ങള്‍ക്ക് മുൻപ് തന്നെ അവസാനിച്ചുവെന്നാണ് ഞാൻ കരുതിയത്. എന്നാൽ അയാൾ തന്റെ ബൗളിംഗിന്റെ മൂർച്ചക്കൂട്ടി മികച്ച രീതിയിലാണ് പന്തെറിയുന്നതെന്നും മഗ്രാത്ത് പറഞ്ഞു.
 
ഇഷാന്ത് പരിക്കേറ്റ് തിരിച്ചെത്തിയ ആദ്യ ഇന്നിങ്‌സില്‍ത്തന്നെ അഞ്ച് വിക്കറ്റ് നേടി. ബൂമ്രയും പരിക്കില്‍ നിന്ന് മോചിതനായി തിരിച്ചെത്തിയിട്ടുണ്ട്. അതിനാൽ തന്നെ ലോകത്തിലേറ്റവും മികച്ച പേസ് നിരകളിൽ ഒന്നാണ് ഇന്ത്യക്കുള്ളതെന്നും ന്യൂസീലന്‍ഡിനെതിരായ രണ്ടാം ടെസ്റ്റില്‍ ഇന്ത്യന്‍ പേസ് നിര കൂടുതല്‍ ശക്തി പ്രകടിപ്പിക്കുമെന്നാണ് വിശ്വാസമെന്നും താരം പറഞ്ഞു.
 
ഷമിയുടെ വേഗം മികച്ചതാണെന്നും അനുഭവസമ്പത്തും കളിയെക്കുറിച്ച് അറിവുമുള്ള അദ്ദേഹത്തിന് എത് ദിശയിലേക്കും പന്ത് സ്വിങ് ചെയ്യിക്കാനുള്ള കഴിവ് അപാരമാണെന്നും മഗ്രാത്ത് അഭിപ്രായപ്പെട്ടു. ന്യൂസിലൻഡിനെതിരായ ഒന്നാം ക്രിക്കറ്റ് ടെസ്റ്റിൽ ഇന്ത്യയുടെ സീനിയർ ബൗളറായ ഇഷാന്ത് ശർമ്മക്ക് തിളങ്ങാൻ സാധിച്ചിരുന്നെങ്കിലും ബു‌മ്രയും ഷമിയും നിരാശപ്പെടുത്തുന്ന പ്രകടനമാണ് കാഴ്ച്ചവെച്ചത്.ടെസ്റ്റ് ചാമ്പ്യന്‍ഷിപ്പിലെ ആദ്യ തോല്‍വി വഴങ്ങിയ ഇന്ത്യക്ക് രണ്ടാം ടെസ്റ്റിലെ ജയം അഭിമാനപ്രശ്‌നം കൂടിയാണ്. 

വെബ്ദുനിയ വായിക്കുക

അടുത്ത ലേഖനം "ടെന്നീസ്, ഞാന്‍ നിന്നോട് വിട പറയുന്നു" ടെന്നീസിലെ റഷ്യൻ സൗന്ദര്യം വിരമിച്ചു