ഐസിസി ടി20 റാങ്കിംഗിൽ ഒന്നാം സ്ഥാനം നിലനിർത്തി സൂര്യകുമാർ യാദവ്. 906 റേറ്റിംഗ് പോയൻ്റുമായാണ് സൂര്യകുമാർ യാദവ് ഇന്നാം സ്ഥാനം നിലനിർത്തിയത്. അതേസമയം ടി20യിൽ ന്യൂസിലൻഡിനെതിരെ നേടിയ സെഞ്ചുറിയോടെ ശുഭ്മാൻ ഗില്ലും റാങ്കിംഗിൽ മുന്നേറി.
പുതിയ ടി20 റാങ്കിംഗിൽ മുപ്പതാം സ്ഥാനത്താണ് ഗിൽ. 23കാരനായ താരം ഏകദിനത്തിൽ ആറാം സ്ഥാനത്തും ടെസ്റ്റിൽ 62ആം സ്ഥാനത്തുമാണ്. ടി20 റാങ്കിംഗിൽ വിരാട് കോലി പതിനഞ്ചമതും നായകൻ രോഹിത് ശർമ 29ആം സ്ഥാനത്തുമാണ്. ടി20 ബൗളിംഗ് റാങ്കിംഗിലെ ആദ്യ പത്തിൽ ഇന്ത്യൻ ബൗളർമാർ ആരും തന്നെയില്ല. 13ആം സ്ഥാനത്തുള്ള ആർഷ്ദീപ് സിംഗാണ് ഉയർന്ന റാങ്കുള്ള ഇന്ത്യൻ ബൗളർ.
ഓൾറൗണ്ടർമാരുടെ പട്ടികയിൽ ഇന്ത്യൻ താരം ഹാർദ്ദിക് പാണ്ഡ്യ രണ്ടാം സ്ഥാനത്തെത്തി. ബംഗ്ലാദേശ് നായകൻ ഷാക്കിബ് അൽ ഹസനാണ് പട്ടികയിൽ ഒന്നാം സ്ഥാനത്തുള്ളത്.
