അദ്ദേഹം ഇപ്പോളാണ് കളിക്കുന്നതെങ്കിൽ ഐപിഎല്ലിൽ വെല്ലാം മറ്റൊരാളുണ്ടാകില്ല: വിരാട് കോലി

ടി20 ക്രിക്കറ്റിലെ എക്കാലത്തെയും മികച്ച താരങ്ങളുടെ പട്ടികയെടുത്താൽ എ ബി ഡിവില്ലിയേഴ്സ്, ക്രിസ് ഗെയ്ൽ എന്നീ താരങ്ങളുടെ പേരുകളാകും ക്രിക്കറ്റ് പ്രേമികളുടെ മനസ്സിൽ പെട്ടെന്ന് വരിക. സച്ചിനും കോലിയും ബാബർ അസമുമെല്ലാം മികച്ച കളിക്കാരാണെങ്കിൽ കൂടി ടി20യിൽ ഈ താരങ്ങളേക്കാൾ മികവ് പുലർത്തിയ താരങ്ങളാണ് ക്രിസ് ഗെയ്‌ലും എ ബി ഡിവില്ലിയേഴ്സും അടങ്ങുന്ന താരങ്ങൾ.

ഇപ്പോഴിതാ വിവിയൻ റിച്ചാർഡ്സ് ഈ കാലഘട്ടത്തിലാണ് ക്രിക്കറ്റ് കളിച്ചിരുന്നെങ്കിൽ ടി20യിൽ അദ്ദേഹത്തെ വെല്ലാൻ മറ്റാർക്കും ആകില്ലായിരുന്നുവെന്ന് അഭിപ്രായപ്പെട്ടിരിക്കുകയാണ് ഇന്ത്യൻ സൂപ്പർ താരം വിരാട് കോലി.സച്ചിനും വിവ് റിച്ചാർഡ്സുമെല്ലാം അവരുടേതായ കാലഘട്ടത്തിൽ ബാറ്റിംഗിൽ വിപ്ലവം സൃഷ്ടിച്ചവരാണെന്നും കോലി പറയുന്നു. സർ റിച്ചാർഡ്സ് ഈ കാലഘട്ടത്തിൽ ഐപിഎൽ കളിച്ചിരുന്നുവെങ്കിൽ അദ്ദേഹത്തെ വെല്ലാൻ മറ്റാർക്കുമാകില്ലെന്നാണ് ഇൻസ്റ്റഗ്രാമിൽ കോലി കുറിച്ചത്. ടി20 ക്രിക്കറ്റിൻ്റെ കളിരീതികളെ പറ്റി റിച്ചാർഡ്സ് സംസാരിക്കുന്ന വീഡിയോയാണ് താരം പങ്കുവെച്ചത്. ദ ബോസ് എന്ന വിശേഷണത്തോടെയാണ് കോലി പോസ്റ്റ് ഷെയർ ചെയ്തിരിക്കുന്നത്.