അവസരം കിട്ടിയാൽ അടിച്ചു തകർത്തോളു, അവന് എല്ലാ സ്വാതന്ത്ര്യവും നൽകിയിട്ടുണ്ട്: രോഹിത്

വെസ്റ്റിന്‍ഡീസിനെതിരായ രണ്ടാം ക്രിക്കറ്റ് ടെസ്റ്റ് മത്സരത്തിന് ഇന്ത്യ ഇന്നിറങ്ങുമ്പോള്‍ ഇന്ത്യന്‍ വിക്കറ്റ് കീപ്പര്‍ ബാറ്ററായ ഇഷാന്‍ കിഷന് ആക്രമിച്ച് കളിക്കാനുള്ള സ്വാതന്ത്ര്യം നല്‍കിയിട്ടുണ്ടെന്ന് ഇന്ത്യന്‍ നായകന്‍ രോഹിത് ശര്‍മ. മത്സരത്തിന് മുന്നോടിയായുള്ള വാര്‍ത്താസമ്മേളനത്തില്‍ സംസാരിക്കുകയായിരുന്നു അദ്ദേഹം.

ഇഷാന്‍ കിഷനില്‍ നിന്നും ടീം എന്താണ് പ്രതീക്ഷിക്കുന്നതെന്ന് അവനോട് കൃത്യമായി പറഞ്ഞുകൊടുത്തിട്ടുണ്ട്. ആക്രമിച്ചു കളിക്കുന്ന പ്രതിഭയുള്ള താരമാണ് ഇഷാന്‍ കിഷന്‍. കിട്ടിയ അവസരങ്ങളിലെല്ലാം അവന്‍ അത് തെളിയിച്ചിട്ടുണ്ട്. അവന്റെ പ്രതിഭയെ തേച്ചുമിനുക്കാനുള്ള ഉത്തരവാദിത്തം ഞങ്ങളുടേതാണ്. ഇടം കൈയ്യന്‍ ബാറ്ററാണെന്നുള്ളതും ആക്രമിച്ച് കളിക്കുന്ന ബാറ്ററാണെന്നതും അവന് അധിക ആനുകൂല്യങ്ങളാണ്. അതിനാല്‍ തന്നെ ആക്രമിച്ച് കളിക്കാനുള്ള സ്വാതന്ത്ര്യം ടീം മാനേജ്‌മെന്റ് അവന് നല്‍കിയിട്ടുണ്ട്. രോഹിത് ശര്‍മ പറഞ്ഞു.

അശ്വിന്റെയും ജഡേജയുടെയും അപ്രതീക്ഷിതമായ പന്തുകളില്‍ ഒരു കീപ്പറെന്ന നിലയില്‍ മികച്ച പ്രകടനമാണ് കിഷന്‍ കാഴ്ചവെച്ചതെന്നും ഇനി ബാറ്റിംഗിലാണ് കഴിവ് തെളിയിക്കാനുള്ളതെന്നും രോഹിത് പറഞ്ഞു.