Ind vs Eng: പരിക്ക് വലയ്ക്കുന്നു, മൂന്നാം ടെസ്റ്റിൽ ഇംഗ്ലണ്ടിനെതിരെ ഇറങ്ങുക ഇന്ത്യൻ യുവനിര?

Indian Team

ഇംഗ്ലണ്ടിനെതിരായ മൂന്നാം ടെസ്റ്റിനൊരുങ്ങുന്ന ഇന്ത്യന്‍ ടീമിന് തിരിച്ചടിയായി താരങ്ങളുടെ പരിക്ക്. സൂപ്പര്‍ ത്രം വിരാട് കോലി വ്യക്തിഗതമായ കാരണങ്ങളാല്‍ ടൂര്‍ണമെന്റില്‍ വിട്ടുനില്‍ക്കുന്നതിന് പുറമെ കെ എല്‍ രാഹുല്‍, രവീന്ദ്ര ജഡേജ തുടങ്ങിയ താരങ്ങളും പരിക്കിനെ തുടര്‍ന്ന് ടീമിന് പുറത്താണ്. മുഹമ്മദ് ഷമി പരിക്ക് മാറി ടീമില്‍ തിരിച്ചെത്തുമെന്ന് വാര്‍ത്തയുണ്ടായിരുന്നുവെങ്കിലും പരിക്ക് മാറാത്തതിനാല്‍ ഷമിയെയും തിരിച്ചുവിളിച്ചിട്ടില്ല. ഇപ്പോഴിതാ സൂപ്പര്‍ താരം ജസ്പ്രീത് ബുമ്ര ഇന്ത്യന്‍ ടീമിനൊപ്പം ചേര്‍ന്നിട്ടില്ല എന്ന വാര്‍ത്തകളാണ് വരുന്നത്.

അതേസമയം ഇതില്‍ ആശങ്കപ്പെടാനില്ലെന്നും എത്രയും പെട്ടെന്ന് തന്നെ ബുമ്ര ടീമിനൊപ്പം ചേരുമെന്നും ടീം മാനേജ്‌മെന്റ് വ്യക്തമാക്കുന്നു. കഴിഞ്ഞ 2 മത്സരങ്ങളിലും മികച്ച പ്രകടനം നടത്തുന്നതില്‍ പരാജയപ്പെട്ട കെ എസ് ഭരതിന് പകരം ധ്രുവ് ജുരലാകും മൂന്നാം ടെസ്റ്റില്‍ വിക്കറ്റ് കീപ്പര്‍ താരമാവുക. കോലിയുടെ അഭാവത്തില്‍ മികച്ച പ്രകടനം നടത്താന്‍ സാധിച്ചില്ലെങ്കിലും മൂന്നാം ടെസ്റ്റില്‍ രജത് പാട്ടീദാര്‍ തന്നെ തുടരാന്‍ സാധ്യതയുണ്ട്. ശ്രേയസ് അയ്യര്‍ക്ക് പകരം സര്‍ഫറാസ് ഖാനായിരിക്കും കളിക്കുക.

ഇതോടെ ഇംഗ്ലണ്ടിനെതിരായ നിര്‍ണായകമത്സരത്തില്‍ ധ്രുവ് ജുരല്‍,രജത് പാട്ടീദാര്‍,സര്‍ഫറാസ് ഖാന്‍ എന്നിങ്ങനെ പുതുമുഖ നിരയുമായാകും ഇന്ത്യ ഇറങ്ങുക. രോഹിത് ശര്‍മ,ജസ്പ്രീത് ബുമ്ര,അശ്വിന്‍ എന്നിവര്‍ മാത്രമാണ് ടീമിലെ പരിചയസമ്പന്നരായ താരങ്ങള്‍.