KCL 2024 Final: കേരള ക്രിക്കറ്റ് ലീഗ് ഫൈനല്‍ ഇന്ന്; കാലിക്കറ്റ് ഗ്ലോബ്സ്റ്റാര്‍സും കൊല്ലം സെയിലേഴ്‌സും ഏറ്റുമുട്ടും

ഒന്നാം സെമി ഫൈനലില്‍ ട്രിവാന്‍ഡ്രം റോയല്‍സിനെ 18 റണ്‍സിനു തോല്‍പ്പിച്ചാണ് കാലിക്കറ്റ് ഗ്ലോബ്സ്റ്റാര്‍സ് ഫൈനലില്‍ എത്തിയത്

Aries Kollam Sailors

Aries Kollam Sailors vs Calicut Globstars: പ്രഥമ കേരള ക്രിക്കറ്റ് ലീഗിന്റെ ഫൈനലില്‍ ഏരീസ് കൊല്ലം സെയിലേഴ്‌സും കാലിക്കറ്റ് ഗ്ലോബ്സ്റ്റാര്‍സും ഏറ്റുമുട്ടും. ഇന്ന് വൈകിട്ട് 6.45 ന് തിരുവനന്തപുരം ഗ്രീന്‍ഫീല്‍ഡ് സ്റ്റേഡിയത്തിലാണ് കലാശപ്പോര്. സ്റ്റാര്‍ സ്പോര്‍ട്സ് 1 ല്‍ മത്സരങ്ങള്‍ തത്സമയം കാണാം. ഫാന്‍കോഡ് ആപ്പിലും വെബ് സൈറ്റിലും മത്സരങ്ങളുടെ തത്സമയം സംപ്രേഷണമുണ്ട്. കേരള ക്രിക്കറ്റ് ലീഗ് മത്സരങ്ങള്‍ കാണാന്‍ സ്റ്റേഡിയത്തിലേക്ക് സൗജന്യ പ്രവേശനവുമുണ്ട്. 

ഒന്നാം സെമി ഫൈനലില്‍ ട്രിവാന്‍ഡ്രം റോയല്‍സിനെ 18 റണ്‍സിനു തോല്‍പ്പിച്ചാണ് കാലിക്കറ്റ് ഗ്ലോബ്സ്റ്റാര്‍സ് ഫൈനലില്‍ എത്തിയത്. ഏരീസ് കൊല്ലം സെയിലേഴ്‌സ് തൃശൂര്‍ ടൈറ്റന്‍സിനെയാണ് സെമിയില്‍ തോല്‍പ്പിച്ചത്. അഭിഷേക് നായര്‍, സച്ചിന്‍ ബേബി എന്നിവരുടെ മികച്ച ഫോമിലാണ് കൊല്ലം സെയിലേഴ്‌സിന്റെ പ്രതീക്ഷ. ബൗളര്‍ അഖില്‍ സ്‌കറിയയാണ് ഗ്ലോബ്സ്റ്റാര്‍സിന്റെ തുറുപ്പുച്ചീട്ട്. 

കേരള ക്രിക്കറ്റ് അസോസിയേഷന്റെ നേതൃത്വത്തിലുള്ള ലീഗില്‍ ആറ് ടീമുകളാണ് ഏറ്റുമുട്ടിയത്. ഫൈനല്‍ അടക്കം 33 മത്സരങ്ങള്‍. ഇന്ത്യന്‍ ക്രിക്കറ്റ് ടീമിലെ മലയാളി താരം സഞ്ജു സാംസണ്‍ ആണ് പ്രഥമ കേരള ക്രിക്കറ്റ് ലീഗിന്റെ ഐക്കണ്‍. സെപ്റ്റംബര്‍ രണ്ടിനാണ് ലീഗ് ആരംഭിച്ചത്.