അനുഷ്ക എനിക്ക് വലിയ പ്രചോദനമാണ്, എനിക്കായി ഒരുപാട് ത്യാഗങ്ങൾ ചെയ്തു : വിരാട് കോലി

സെലിബ്രിറ്റി ദമ്പതിമാരിൽ ഏറ്റവുമധികം ആരാധകരുള്ള ജോഡികളിൽ ഒന്നാണ് വിരാട് കോലി- അനുഷ്ക ദമ്പതികൾ. 5 വർഷങ്ങൾക്ക് മുൻപ് ഇറ്റലിയിലെ ടുസ്കനിയിൽ വെച്ചായിരുന്നു ഇരുവരുടെയും വിവാഹം. 2021ലാണ് ദമ്പതികൾക്ക് വാമിക എന്നൊരു മകൾ പിറന്നത്. തങ്ങളുടെ ബന്ധം തുടർന്ന് 5 വർഷമാകുമ്പോൾ തങ്ങൾക്കിടയിലുള്ള അടുപ്പം വർധിക്കുക മാത്രമെ ചെയ്തിട്ടുള്ളുവെന്ന് വിരാട് കോലി പറയുന്നു. ആർസിബി പോഡ്കാസ്റ്റിനിടെയാണ് അനുഷ്കയുമായുള്ള ബന്ധത്തെ പറ്റി കോലി മനസ്സ് തുറന്നത്.

കഴിഞ്ഞ 2 വർഷങ്ങൾ മുൻ വർഷങ്ങളേക്കാൾ വ്യത്യസ്തമായിരുന്നു. ഞങ്ങൾക്ക് ഒരു പെൺകുഞ്ഞ് ജനിച്ചു. ഒരു അമ്മ എന്ന നിലയിൽ അവൾ ഒരുപാട് ത്യാഗങ്ങൾ ചെയ്തു. അവളെ കാണുമ്പോഴെല്ലാം എൻ്റെ പ്രശ്നങ്ങൾ എത്ര ചെറുതാണെന്ന് ഞാൻ മനസിലാക്കി.നിങ്ങൾ എന്താണ് എന്നതിനെ നിങ്ങളുടെ കുടുംബം മനസിലാക്കുക എന്നതിൽ കൂടുതൽ യാതൊന്നും നിങ്ങൾക്ക് ആവശ്യമില്ല. 

ഒരു പ്രചോദനത്തിന് വേണ്ടിയാണ് നിങ്ങൾ നോക്കുന്നതെങ്കിൽ നിങ്ങൾക്കത് നിങ്ങളുടെ വീട്ടിൽ നിന്ന് തന്നെ തുടങ്ങാവുന്നതാണ്. എനിക്ക് അനുഷ്ക ജീവിതത്തിൽ വലിയ പ്രചോദനമാണ്. എനിക്ക് ജീവിതത്തോടുള്ള കാഴ്ചപ്പാട് തന്നെ മാറ്റിയത് അവളാണ്. നിങ്ങൾ ഒരു വ്യക്തിയോട് പ്രണയത്തിലാകുമ്പോൾ നിങ്ങൾക്കുള്ളിലും മാറ്റങ്ങൾ സംഭവിക്കും. കാര്യങ്ങൾ ഏറ്റുവാങ്ങാനും കൂടുതൽ മെച്ചപ്പെട്ട വ്യക്തിയായി മാറാനും അവൾ എന്നെ സഹായിച്ചിട്ടുണ്ട്. കോലി പറഞ്ഞു.