സമകാലിക ക്രിക്കറ്റിലെ ഏറ്റവും മികച്ച ഫിനിഷർമാരിൽ ഒരാളായാണ് ദക്ഷിണാഫ്രിക്കൻ താരം ഡേവിഡ് മില്ലറെ കണക്കാക്കുന്നത്. ഐപിഎല്ലിലും ദേശീയ ജേഴ്സിയിലും മികച്ച പ്രകടനമാണ് താരം കാഴ്ച വെക്കുന്നത്. എതിരാളികളെ വലിച്ചുകീറുന്ന മില്ലർക്ക് കില്ലർ മില്ലർ എന്നൊരു പേരുകൂടിയുണ്ട്. ഇപ്പോഴിതാ തനിക്ക് ഏറ്റവും ഇഷ്ടപ്പെട്ട ഫിനിഷർ ആരെന്ന് വ്യക്തമാക്കിയിരിക്കുകയാണ് താരം.
ഇന്ത്യയുടെ ഇതിഹാസതാരമായ എം എസ് ധോനിയാണ് തനിക്കേറ്റവും ഇഷ്ടപ്പെട്ട ഫിനിഷർ എന്നാണ് മില്ലർ പറയുന്നത്. ലോകക്കപ്പ് വിജയത്തിലടക്കം ധോനിയുടെ ഫിനിഷിങ്ങ് മികവ് ലോകം കണ്ടിരുന്നു. എതിരാളികളുടെ യാതൊരു സമ്മർദ്ദത്തിനും കീഴടങ്ങാതെയായിരുന്നു ധോനിയുടെ പ്രകടനങ്ങളെല്ലാം.
രാജ്യാന്തര ക്രിക്കറ്റിൽ 90 ടെസ്റ്റിൽ 4876 റണ്‍സും 350 ഏകദിനങ്ങളില്‍ 10773 റണ്‍സും 98 രാജ്യാന്തര ടി20കളില്‍ 1617 റണ്‍സും ഐപിഎല്ലിൽ 234 മത്സരങ്ങളില്‍ 4978 റണ്‍സും ധോനിയുടെ പേരിലുണ്ട്. നായകനെന്ന നിലയിൽ 2007ലെ ടി20 ലോകകപ്പും 2011ലെ ഏകദിന ലോകകപ്പും 2013ലെ ചാമ്പ്യൻസ് ട്രോഫിയും സ്വന്തമാക്കിയ താരം കൂടിയാണ് ധോനി.
