താന്‍ നേരിട്ടിട്ടുള്ളതില്‍ വെച്ച് ഏറ്റവും അപകടകാരിയായ ബോളര്‍ പാകിസ്ഥാന്‍ പേസര്‍ മുഹമ്മദ് അമീറാണെന്ന ഇന്ത്യന്‍ ക്യാപ്‌റ്റന്‍ വിരാട് കോഹ്‌ലിയുടെ പ്രസ്‌താവനയ്‌ക്ക് മറുപടിയുമായി അമീര്‍ നേരിട്ട് രംഗത്ത്.
ലോകത്തിലെ ഏറ്റവും മികച്ച ബാറ്റ്‌സ്‌മാനായ കോഹ്‌ലിയില്‍ നിന്നും ലഭിച്ച പ്രശംസയില്‍ ഞാന്‍ വീണുപോയി. വിരാടിനെപ്പോലെ അപകടകാരിയായ ബാറ്റ്‌സ്‌മാന്‍ എന്നെക്കുറിച്ച് ഇങ്ങനെ പറഞ്ഞെങ്കില്‍ ഒരു ബോളറെന്ന എന്ന നിലയില്‍ എനിക്കുള്ള അംഗീകാരമാണ്. എതിര്‍ ടീമിനുണ്ടാകുന്ന ചെറിയ വീഴ്‌ച പോലും മുതലെടുക്കുന്ന താരമാണ് ഇന്ത്യന്‍ ക്യാപ്‌റ്റനെന്നും ആമീര്‍ കൂട്ടിച്ചേര്‍ത്തു.
വമ്പന്‍ ടോട്ടലുകള്‍ പിന്തുടരാന്‍ കോഹ്‌ലിക്ക് അസാധ്യമായ ശേഷിയുണ്ട്. അതിനാലാണ് ലോക ക്രിക്കറ്റിലെ ബൗളര്‍മാര്‍ക്ക് വിരാട് ഭീഷണിയായി തുടരുന്നത്. ഏറ്റവും മികച്ച സ്ട്രൈക്ക് റേറ്റും ശരാശരിയും അദ്ദേഹത്തിന്റെ പേരിലാണ്. കൊല്‍ക്കത്തയില്‍വെച്ച് കോഹ്‌ലി സമ്മാനിച്ച ബാറ്റ് തനിക്ക് ഇപ്പോഴും മധുരിക്കുന്ന ഓര്‍മയാണെന്നും അമീര്‍ പറഞ്ഞു.
ബോളിവുഡ് താരം ആമീര്‍ ഖാനുമൊത്തുള്ള ഒരു ചാറ്റ് ഷോയ്ക്കിടെയാണ് താന്‍ നേരിട്ടിട്ടുള്ളതില്‍ ഏറ്റവും കടുപ്പമേറിയ ബൗളര്‍ മുഹമ്മദ് അമീര്‍ ആണെന്ന് കോഹ്‌ലി പറഞ്ഞത്.