സൂപ്പര്‍ ത്രില്ലര്‍ ! ഇതുപോലൊരു ടെസ്റ്റ് മത്സരം നിങ്ങള്‍ കണ്ടുകാണില്ല; ഫോളോണ്‍ ചെയ്ത ന്യൂസിലന്‍ഡിന് ഒടുവില്‍ ഒരു റണ്‍ ജയം
ന്യൂസിലന്‍ഡിന് വേണ്ടി നെയ്ല്‍ വാഗ്നര്‍ നാല് വിക്കറ്റുകള്‍ വീഴ്ത്തി
ഇംഗ്ലണ്ടിനെതിരായ രണ്ടാം ടെസ്റ്റില്‍ ന്യൂസിലന്‍ഡിന് നാടകീയ ജയം. ആദ്യ ഇന്നിങ്‌സില്‍ ഫോളോണ്‍ വഴങ്ങിയ ന്യൂസിലന്‍ഡ് രണ്ടാം ഇന്നിങ്‌സില്‍ അതിശയിപ്പിക്കുന്ന തിരിച്ചുവരവാണ് നടത്തിയത്. ഒരു റണ്‍ വിജയമാണ് കിവീസ് സ്വന്തമാക്കിയത്. രണ്ടാം ഇന്നിങ്‌സില്‍ 258 റണ്‍സ് വിജയലക്ഷ്യം പിന്തുടരാന്‍ ഇറങ്ങിയ ഇംഗ്ലണ്ട് 256 റണ്‍സിന് ഓള്‍ഔട്ടായി.
സ്‌കോര്‍ ബോര്‍ഡ്
ഇംഗ്ലണ്ട് ഒന്നാം ഇന്നിങ്‌സ് : 435-8 ഡിക്ലയര്‍
ന്യൂസിലന്‍ഡ് ഒന്നാം ഇന്നിങ്‌സ് : 209 - 10
ഫോളോണ്‍ വഴങ്ങി രണ്ടാം ഇന്നിങ്‌സ് ബാറ്റിങ് ആരംഭിച്ച ന്യൂസിലന്‍ഡ് 483-10
ഇംഗ്ലണ്ട് രണ്ടാം ഇന്നിങ്‌സ് 256-10
രണ്ടാം ഇന്നിങ്‌സില്‍ ഇംഗ്ലണ്ട് നിരയില്‍ തിളങ്ങിയത് ജോ റൂട്ട് മാത്രം. 113 പന്തില്‍ എട്ട് ഫോറും മൂന്ന് സിക്‌സും സഹിതം 95 റണ്‍സാണ് റൂട്ട് നേടിയത്. ബെന്‍ ഫോക്‌സ് 35 റണ്‍സും ബെന്‍ സ്റ്റോക്‌സ്, ബെന്‍ ഡക്കറ്റ് എന്നിവര്‍ 33 റണ്‍സ് വീതവും നേടി. മറ്റാര്‍ക്കും തിളങ്ങാനായില്ല.
ന്യൂസിലന്‍ഡിന് വേണ്ടി നെയ്ല്‍ വാഗ്നര്‍ നാല് വിക്കറ്റുകള്‍ വീഴ്ത്തി. ടിം സൗത്തി, മാറ്റ് ഹെന്റി എന്നിവര്‍ മൂന്നും രണ്ടും വീതം വിക്കറ്റുകള്‍ സ്വന്തമാക്കി.
ഫോളോണ്‍ വഴങ്ങിയ ന്യൂസിലന്‍ഡിനെ സെഞ്ചുറി ഇന്നിങ്‌സോടെ മികച്ച നിലയിലേക്ക് എത്തിച്ചത് നായകന്‍ കെയ്ന്‍ വില്യംസണ്‍ ആണ്. വില്യംസണ്‍ 282 പന്തില്‍ 12 ഫോര്‍ സഹിതം 132 റണ്‍സ് നേടി. ടോം ബ്ലഡല്‍ 166 പന്തില്‍ 90 റണ്‍സും ടോം ലാതം 172 പന്തില്‍ 83 റണ്‍സും നേടി.
