ഇംഗ്ലണ്ട് ക്രിക്കറ്റിലെ പല താരങ്ങള്‍ക്കും രസകരമായ പേരുകളുള്ളത് ക്രിക്കറ്റ് പ്രേമികളുടെ ശ്രദ്ധയില്‍ പണ്ടേയുള്ള കാര്യമാണ്. അലിസ്റ്റര്‍ കുക്ക്,ഇയാന്‍ ബെല്‍,മസ്റ്റാര്‍ഡ്, സാം ബില്ലിംഗ്‌സ്, ജോ റൂട്ട് പോലെ രസകരമായ പേരുകളുള്ള നിരവധി താരങ്ങള്‍ ഇംഗ്ലണ്ട് ക്രിക്കറ്റില്‍ നിന്നും ഉണ്ടായിട്ടുണ്ട്. ഇതില്‍ പല താരങ്ങളും അന്താരാഷ്ട്ര ക്രിക്കറ്റില്‍ കഴിവ് തെളിയിച്ചവരാണ്. ഇപ്പോഴിതാ ഈ ലിസ്റ്റിലേക്ക് പുതിയ ഓപ്പണിംഗ് ജോഡി കൂടി ഇംഗ്ലണ്ട് ക്രിക്കറ്റിലേക്ക് എത്തുകയാണ്.
വെസ്റ്റിന്‍ഡീസ് പര്യടനത്തിനുള്ള ഇംഗ്ലണ്ട് ടീമില്‍ നിന്നും നായകന്‍ ജോസ് ബട്ട്ലര്‍ വിട്ടുനിന്നതോടെ പ്രഖ്യാപിക്കപ്പെട്ട ഇംഗ്ലണ്ട് ടീമിലാണ് പേര് കൊണ്ട് കൗതുകം തോന്നിക്കുന്ന പുതിയ താരങ്ങള്‍ എത്തിയിരിക്കുന്നത്. ബട്ട്ലറിന് പകരക്കാരനായി വിക്കറ്റ് കീപ്പര്‍ ബാറ്ററായ മൈക്കല്‍ പെപ്പറിനെയാണ് ഇംഗ്ലണ്ട് ടീമിലെടുത്തിരിക്കുന്നത്. ഇതോടെ ഫില്‍ സാള്‍ട്ടിനൊപ്പം പെപ്പറാകും ഇംഗ്ലണ്ടിന്റെ ഓപ്പണറാവുക.
ഐപിഎല്ലിലൂടെ 28കാരനായ ഫില്‍ സാള്‍ട്ട് ക്രിക്കറ്റ് പ്രേമികള്‍ക്ക് പരിചിതനാണ്. അതേസമയം ആഭ്യന്തര ക്രിക്കറ്റിലെ മികച്ച പ്രകടനത്തോടെയാണ് മൈക്കല്‍ പെപ്പര്‍ ഇംഗ്ലണ്ട് ടീമിലെത്തിയിരിക്കുന്നത്. ഇതോടെ വരാനിരിക്കുന്ന പരമ്പരയില്‍ സാള്‍ട്ടും പെപ്പറും ചേര്‍ന്നായിരിക്കും ഇംഗ്ലണ്ടിനായി ഓപ്പണ്‍ ചെയ്യുക. ഈ കൂട്ടുക്കെട്ട് മികച്ച പ്രകടനം നടത്തിയാല്‍ ഇംഗ്ലണ്ടിന്റെ സാള്‍ട്ട് ആന്‍ഡ് പെപ്പര്‍ കോമ്പോ ലോകക്രിക്കറ്റില്‍ തന്നെ ഹിറ്റാകുമെന്ന് ഉറപ്പാണ്. അതിനാല്‍ തന്നെ പുതിയ ജോഡിയുടെ പ്രകടനം കാണാനുള്ള കാത്തിരിപ്പിലാണ് ക്രിക്കറ്റ് ആരാധകര്‍.
